Mumbai Pod Taxi : मुंबईकरांचा प्रवास होणार हायटेक! देशातील पहिल्या ‘पॉड टॅक्सी’ प्रकल्पाचे भूमिपूजन; बीकेसी ते कुर्ला अवघ्या काही मिनिटांत

Mumbai Pod Taxi MMRDA Project : मुंबईच्या सार्वजनिक वाहतुकीमध्ये एक ऐतिहासिक बदल घडवून आणणाऱ्या देशातील पहिल्या ‘पॉड टॅक्सी’ प्रकल्पाचे भूमिपूजन मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या हस्ते आज पार पडले. मुंबई महानगर प्रदेश विकास प्राधिकरणाने (MMRDA) हाती घेतलेला हा प्रकल्प प्रामुख्याने वांद्रे-कुर्ला संकुल (BKC) आणि रेल्वे स्थानकांना जोडणारा असेल. वाढत्या गर्दीवर मात करण्यासाठी आणि कॉर्पोरेट हबमधील कर्मचाऱ्यांना वेगवान प्रवासाचा पर्याय देण्यासाठी ही चालकविरहित सेवा अत्यंत महत्त्वाची मानली जात आहे. विशेष म्हणजे, दुबई आणि हिथ्रो यांसारख्या जागतिक शहरांनंतर आता मुंबईतही अशा प्रकारची अत्याधुनिक वाहतूक व्यवस्था पाहायला मिळणार आहे.

प्रकल्पाचा आराखडा आणि तांत्रिक वैशिष्ट्ये
हा संपूर्ण प्रकल्प AI (कृत्रिम बुद्धिमत्ता) तंत्रज्ञानावर आधारित असून यामध्ये चालकाची गरज भासणार नाही. या प्रकल्पाशी संबंधित महत्त्वाची माहिती जाणून घेऊ.

– एकूण मार्ग: या मार्गाची एकूण लांबी 8.85 किमी असून त्यामध्ये एकूण 22 वातानुकूलित स्थानके असतील.
– वेग आणि क्षमता: ही टॅक्सी ताशी 40 किमी वेगाने धावेल आणि एका पॉडमध्ये एकावेळी 6 प्रवासी बसू शकतील.
– प्रवास खर्च: 2022 मधील अंदाजानुसार, या टॅक्सीचे भाडे प्रति किलोमीटर सुमारे 21 रुपये असण्याची शक्यता आहे.
– कामकाज: वाहतुकीला अडथळा येऊ नये म्हणून या प्रकल्पाचे बांधकाम प्रामुख्याने रात्रीच्या वेळी केले जाणार आहे.

पहिला टप्पा आणि महत्त्वाची स्थानके
या प्रकल्पाचा पहिला टप्पा 3.3 किमी ते 3.36 किमी लांबीचा असेल. यामध्ये एकूण 8 स्थानकांचा समावेश असून ते कुर्ला ते वांद्रे या दरम्यानची महत्त्वाची ठिकाणे जोडतील. या मार्गावर प्रामुख्याने ही पॉड टॅक्सी चालेल.
– कुर्ला आणि एलबीएस मार्ग
– बीकेसी मधील विविध ब्लॉक्स (उदा. जी ब्लॉक, बीडीबी गेट 11)
– एमएमआरडीए कार्यालय आणि पे अँड पार्क
– वांद्रे टर्मिनस आणि कलानगर
– उत्पादन शुल्क विभाग आणि ऑडिट भवन

हेही वाचा – Mumbai Metro 9: मुंबई-मिरा भाईंदर आता अवघ्या 30 मिनिटांत; मुख्यमंत्री फडणवीसांच्या हस्ते मेट्रो 9 चे लोकार्पण

बीकेसीच्या कर्मचाऱ्यांसाठी ‘गेमचेंजर’
वांद्रे आणि कुर्ला स्थानकावरून बीकेसीमध्ये कामाला जाणाऱ्या लाखो कर्मचाऱ्यांना सध्या रिक्षा आणि टॅक्सीवर अवलंबून राहावे लागते. या प्रकल्पामुळे प्रवाशांना फारसे चालावे लागणार नाही, कारण दर 200 मीटर अंतरावर स्थानक उभारण्याचे नियोजन आहे. हे पॉड्स विजेवर चालणारे असल्याने ते पर्यावरणपूरक आहेत. फूटपाथवर परिणाम होऊ नये म्हणून या मार्गिकेचे काम दुभाजकाच्या ठिकाणी केले जाईल, ज्यामुळे पादचाऱ्यांनाही त्रास होणार नाही.

कधी होणार प्रकल्प पूर्ण?
सुमारे 1,016 कोटी रुपये खर्चून उभारला जाणारा हा प्रकल्प मुंबईच्या दळणवळण क्षेत्रातील एक मोठे पाऊल आहे. वांद्रे पूर्व ते कुर्ला अशी जोडणी करणाऱ्या या सेवेचा पहिला टप्पा 2027 च्या अखेरपर्यंत प्रवाशांसाठी खुला होण्याचे उद्दिष्ट ठेवण्यात आले आहे. यामुळे केवळ वाहतूक कोंडीतून सुटका होणार नाही, तर मुंबईच्या शिरपेचात आणखी एक मानाचा तुरा रोवला जाणार आहे.

हेही वाचा – Air India चा प्रवास महागणार! 8 एप्रिलपासून विमान तिकिटांच्या दरात मोठी वाढ; जाणून घ्या नवे दर