वर्षा गायकवाड यांच्या नेतृत्वात मुंबई काँग्रेसची बैठक; ५० माजी नगरसेवकांची दांडी

मुंबई, २८ सप्टेंबर २०२३, प्रतिनिधी: मनोरंजन व खेळाची मैदाने खासगी संस्थांना दत्तक तत्त्वावर देण्याच्या मुंबई महापालिकेच्या प्रस्तावित धोरणावर चर्चा करण्यासाठी मुंबई काँग्रेसतर्फे बुधवारी बैठक आयोजित करण्यात आली होती. या बैठकीला ७० ते ८० माजी नगरसेवकांना निमंत्रित केले होते. त्यापैकी फक्त २० ते २५ माजी नगरसेवक आणि एक आमदार तर एक माजी खासदार उपस्थित होते. इतर मोठ्या नेत्यांनी बैठकीकडे पाठ फिरविली.

मुंबई काँग्रेसच्या अध्यक्ष वर्षा गायकवाड यांनी मुंबई काँग्रेस कार्यालयात ही बैठक बोलावली होती. या बैठकीस सन २०१२ व २०१७मध्ये निवडून आलेले काँग्रेसचे नगरसेवक, माजी खासदार, आमदार यांना निमंत्रित करण्यात आले होते. माजी खासदार संजय निरुपम, आमदार अमिन पटेल, माजी आमदार अशोक जाधव, पालिकेतील माजी विरोधी पक्षनेते रवी राजा, अश्रफ आझमी, आसिफ झकेरिया उपस्थित होते.

आमदार भाई जगताप यांच्यासह मुंबईतील अन्य तीन आमदारांनी दांडी मारली. गेल्या दोन पालिका निवडणुकांमध्ये काँग्रेसचे अनुक्रमे ५२ व ३१ नगरसेवक निवडून आले होते. आपल्या विभागातील मोकळ्या जागांची माहिती नगरसेवकांना असते. त्यांच्या माहितीचा अभ्यास करून अधिकाधिक हरकती व सूचना पालिकेत पाठवण्यासाठी ही बैठक महत्त्वाची होती. मात्र नगरसेवकांनाच रस नसल्याबद्दल काँग्रेसच्या वरिष्ठ नेत्याने नाराजी व्यक्त केली.