मुंबईत ‘या’ दिवशी २४ तास विनामूल्य पार्किंग
मुंबई, १५ सप्टेंबर २०२३, प्रतिनिधी : मुंबई जिल्हा पालकमंत्री दीपक केसरकर यांच्या अध्यक्षतेखाली मुंबई महापालिकेच्या अधिकाऱ्यांची बैठक झाली. या बैठकीत एक मोठा निर्णय झाला. मुंबईत गणपती विसर्जनाच्या दिवशी विसर्जन स्थळाजवळ सार्वजनिक वाहन तळावर विनामूल्य पार्किंगची सोय उपलब्ध करून दिली जाईल. पिण्याचे पाणी, निर्माल्य कलश, पार्किंग, बस, रेल्वेसेवा, शौचालय या सेवांच्या नियोजनाबाबतही पालकमंत्र्यांच्या अध्यक्षतेखालील बैठकीत चर्चा झाली.
प्रमुख विसर्जनस्थळी भाविकांना पाण्याच्या बाटल्या पुरविण्यात येतील. भाविक व गणेशोत्सव मंडळांच्या निर्माल्याच्या व्यवस्थेसाठी घनकचरा व्यवस्थापन विभाग सुसज्ज आहे. तर विसर्जन परिसरातल्या शौचालयाची सुविधा विनामूल्य उपलब्ध करून देण्यात येईल, असे पालिकेच्या अधिकाऱ्यांनी बैठकीत सांगितले.
गणेशोत्सव कालावधीत मुंबईत फिरणाऱ्या नागरिकांची गैरसोय होऊ नये म्हणून बेस्ट आणि रेल्वेने रात्रभर सेवा उपलब्ध करून द्यावी, अशा सूचना केसरकर यांनी दिल्या. विसर्जनस्थळाच्या परिसरात पुरवण्यात येणाऱ्या सुविधांचे फलक लावून जनजागृती करा, विसर्जन मिरवणूक मार्गावर चिन्हे आणि दिशादर्शक फलक व खुणांचा वापर करण्याचे निर्देशही त्यांनी पोलिस आणि मुंबई पालिकेला दिले.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.