Flight Cancellation: युद्धाची झळ आकाशाला! भारताची शेकडो विमानं अडकली, DGCA चा मोठा निर्णय

नवी दिल्ली: पश्चिम आशियात इराण आणि इस्रायल यांच्यात सुरू असलेल्या संघर्षामुळे संपूर्ण प्रदेशात तणावपूर्ण परिस्थिती निर्माण झाली आहे. या संघर्षाचा सर्वाधिक परिणाम आंतरराष्ट्रीय हवाई वाहतुकीवर होताना दिसत आहे. अनेक देशांनी सुरक्षा कारणास्तव हवाई क्षेत्र अद्याप पूर्णपणे बंद ठेवले असल्याने विमानसेवेवर मोठा परिणाम झाला आहे. परिणामी अनेक उड्डाणे रद्द करण्यात आली असून हजारो प्रवाशांचे प्रवास नियोजन विस्कळीत झाले आहे.

केंद्रीय नागरी विमान वाहतूक मंत्रालयाने दिलेल्या माहितीनुसार, परिस्थितीचा आढावा घेत अनेक उड्डाणे रद्द करण्याचा निर्णय घ्यावा लागला. 8 मार्च रोजी पश्चिम आशियातून भारतात येण्यासाठी भारतीय विमान कंपन्यांची एकूण 49 उड्डाणे नियोजित होती. मात्र सुरक्षा आणि तांत्रिक अडचणी लक्षात घेता एकूण 279 उड्डाणे रद्द करण्यात आली. त्यामुळे प्रवाशांनी विमानतळावर जाण्यापूर्वी उड्डाणाची स्थिती तपासणे अत्यंत आवश्यक असल्याचे मंत्रालयाने स्पष्ट केले आहे.

मंत्रालयाच्या म्हणण्यानुसार, पश्चिम आशियातील परिस्थितीवर सरकार सतत लक्ष ठेवून आहे. प्रवाशांची सुरक्षितता आणि उड्डाणांचे सुयोग्य नियोजन यासाठी विमान कंपन्यांकडून आवश्यक बदल करण्यात येत आहेत. या प्रदेशात अडकलेल्या प्रवाशांना सुरक्षितपणे बाहेर काढण्यासाठी सरकार आणि विमान कंपन्या संयुक्तपणे प्रयत्न करत असल्याची माहितीही देण्यात आली. त्यामुळे प्रवाशांनी प्रवासापूर्वी उड्डाणाची अद्ययावत माहिती तपासावी, असे आवाहन करण्यात आले आहे.

हेही वाचा: Suryakumar Yadav : टीम इंडियाने कोरलं T20 विश्वचषकावर नाव, कॅप्टन सूर्यकुमार यादवच्या ‘त्या’ कृतीमुळे क्रिकेटप्रेमी भावूक

उपलब्ध आकडेवारीनुसार, 7 मार्च रोजी पश्चिम आशियातून भारतात भारतीय विमान कंपन्यांची 51 उड्डाणे झाली होती. या उड्डाणांमधून एकूण 8,175 प्रवासी सुरक्षितपणे भारतात परतले. तर 8 मार्च रोजी एअर इंडिया, एअर इंडिया एक्सप्रेस, इंडिगो, स्पाइसजेट आणि अकासा एअर या कंपन्यांनी मिळून 49 उड्डाणे चालवण्याची योजना आखली होती. ही उड्डाणे दुबई, अबू धाबी, रास अल खैमाह, फुजैराह, मस्कत आणि जेद्दा या शहरांतून भारतासाठी नियोजित होती.

दरम्यान, 9 मार्च रोजी भारतीय विमान कंपन्या सुमारे 50 उड्डाणे चालवण्याची तयारी करत असल्याची माहिती मंत्रालयाने दिली आहे. याशिवाय पश्चिम आशियातील इतर विमानतळांची स्थितीही सातत्याने तपासली जात असून गरज पडल्यास अतिरिक्त उड्डाणे सुरू करण्याचाही विचार केला जात आहे.

हवाई तिकिटांच्या दरांवरही सरकारने लक्ष ठेवले आहे. विमान कंपन्यांशी सतत संपर्क साधून प्रवाशांवर आर्थिक भार वाढू नये यासाठी तिकिटांचे दर अनावश्यकरीत्या वाढू नयेत, याची काळजी घेतली जात आहे. त्यामुळे प्रवाशांनी प्रवासापूर्वी संबंधित विमान कंपनीकडून उड्डाणाची ताजी माहिती घेणे आणि आवश्यक खबरदारी घेणे महत्त्वाचे असल्याचे सरकारने स्पष्ट केले आहे.

हेही वाचा: T20 World Cup: . “स्टेडियममध्ये फक्त निळा समुद्र…” मिचेल सॅन्टनरने भारतीय चाहत्यांच्या प्रेमासमोर झुकवले मस्तक