Vande Mataram Discussion: संसदेत ‘वंदे मातरम्’चा ऐतिहासिक आढावा; मोदी आणि शाह करतील नेतृत्व
नवी दिल्ली: ‘वंदे मातरम्’च्या 150 व्या वर्षपूर्तीच्या निमित्ताने आज संसदेत विस्तृत चर्चा होणार असून या राष्ट्रीय गीताशी संबंधित अनेक महत्त्वपूर्ण आणि अल्पज्ञात बाबी देशासमोर येण्याची अपेक्षा आहे. लोकसभेत या विशेष चर्चेची सुरुवात पंतप्रधान नरेंद्र मोदी करतील. त्यानंतर संरक्षणमंत्री राजनाथ सिंह दुसरे वक्ते म्हणून आपले मत मांडतील. काँग्रेसच्या वतीने उपनेते गौरव गोगोई आणि प्रियंका गांधी वड्रा चर्चेत सहभागी होतील.
बंकिमचंद्र चट्टोपाध्याय यांनी रचित आणि जदुनाथ भट्टाचार्य यांनी संगीतबद्ध केलेल्या ‘वंदे मातरम्’ या गीताची 150 वी वर्षगाठ साजरी करण्यासाठी वर्षभर विविध उपक्रम आयोजित केले जात आहेत. त्याचाच एक भाग म्हणून लोकसभेत सलग 10 तास चर्चा ठेवण्यात आली आहे. या चर्चेद्वारे ‘वंदे मातरम्’चा इतिहास, त्याचे सांस्कृतिक, सामाजिक आणि राष्ट्रीय महत्त्व याविषयी अधिक सखोल माहिती जनतेपर्यंत पोहोचवण्याचा प्रयत्न आहे.
अलीकडेच पंतप्रधान मोदी यांनी काँग्रेसवर टीका करताना 1937 मध्ये या गीतातील प्रमुख ओळी वगळल्याचा आरोप केला होता. सात नोव्हेंबर रोजी मोदी यांनी वर्षभर चालणाऱ्या वार्षिकोत्सवाचा शुभारंभ केला. विशेषतः तरुणाई आणि विद्यार्थ्यांमध्ये राष्ट्रगीताविषयी जागरूकता वाढवणे हा या उपक्रमाचा उद्देश असल्याचे त्यांनी सांगितले. उद्या म्हणजेच मंगळवारी राज्यसभेत ‘वंदे मातरम्’वरील चर्चेची सुरुवात केंद्रीय गृह मंत्री अमित शाह करतील. त्यांच्यानंतर राज्यसभेतील नेते आणि केंद्रीय आरोग्यमंत्री जे. पी. नड्डा आपले विचार मांडतील.
अधिकाऱ्यांनी दिलेल्या माहितीनुसार, चर्चेदरम्यान या गीताशी संबंधित अनेक अनोळखी पैलू पहिल्यांदाच प्रकाशात येण्याची शक्यता आहे. दरम्यान, लोकसभेत निवडणूक सुधारणा विषयावरही व्यापक चर्चा होणार आहे. मतदार यादीच्या विशेष गहन पुनरीक्षणासह निवडणूक प्रक्रियेचे विविध मुद्दे मंगळवार आणि बुधवार या दिवशी विचारात घेतले जातील. राज्यसभेतही बुधवार आणि गुरुवारी या विषयावर स्वतंत्र चर्चा होईल.
वरोधी पक्षाची बाजू मांडण्यासाठी काँग्रेसने नेत्यांची यादी तयार केली आहे. वंदे मातरम् विषयावरील चर्चेत गौरव गोगोई आणि प्रियंका गांधी सहभागी होतील, तर निवडणूक सुधारणा चर्चेत पुढील दिवशी राहुल गांधी बोलतील. दीपेंद्र हुड्डा, प्राणिती शिंदे, प्रशांत पडोले आणि इतर काही खासदारही या चर्चेत सहभाग घेणार आहेत. राज्यसभेत विरोधी पक्षनेते मल्लिकार्जुन खर्गे मत मांडणार आहेत. संसदेत आजचा दिवस ऐतिहासिक ठरण्याची चिन्हे स्पष्ट आहेत. वंदे मातरम गीताच्या 150 वर्षांच्या प्रवासाचा आढावा घेणे आणि त्याच्या आधुनिक संदर्भांचा वेध घेणे या दोन्ही दृष्टींनी आजची चर्चा महत्त्वपूर्ण ठरेल.
हेही वाचा: 8th Pay Commission : 8 व्या वेतन आयोगाचा काय होणार परिणाम? तज्ञांनी व्यक्त केली भीती
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.