Surat Man Slip Incident: देव तारी त्याला कोण मारी! 10 व्या मजल्यावरून पडला, पण आठव्या मजल्याच्या ग्रीलमध्ये पाय अडकला अन्…
सुरत : गुजरातच्या सुरत शहरात एक थरारक घटना घडली असून, 10 व्या मजल्यावरून पडलेला 57 वर्षीय व्यक्ती चमत्कारिकरित्या बचावला आहे. झोपेत असताना खिडकीतून खाली पडलेले नितीनभाई आदिया यांचे पाय आठव्या मजल्यावरील फ्लॅटच्या ग्रीलमध्ये अडकले, त्यामुळे मोठा अनर्थ टळला.
ही घटना गुरुवारी सकाळी सुमारे आठ वाजता जहांगिराबाद परिसरातील Time Galaxy-A या उंच इमारतीत घडली. मिळालेल्या माहितीनुसार, नितीनभाई आपल्या 10 व्या मजल्यावरील घरात खिडकीजवळ झोपले होते. झोपेतच तोल जाऊन ते खिडकीतून बाहेर पडले आणि थेट खाली कोसळले.
सुदैवाने, पडताना त्यांचा एक पाय आठव्या मजल्यावरील खिडकीच्या लोखंडी ग्रीलमध्ये आणि बाहेरील प्रोजेक्शनला अडकला. त्यामुळे ते हवेत लटकलेल्या अवस्थेत अडकून राहिले आणि स्वतःला सोडवू शकले नाहीत. हा प्रसंग पाहून इमारतीतील रहिवाशांनी तातडीने Surat Fire and Emergency Services (SFES) ला माहिती दिली.
माहिती मिळताच अग्निशमन दलाचे पथक तात्काळ घटनास्थळी दाखल झाले. बचावकार्यादरम्यान अग्निशमन कर्मचाऱ्यांनी प्रथम आठव्या मजल्यावरील ग्रील कापून मार्ग मोकळा केला, त्यानंतर 10 व्या मजल्यावरून दोरखंड आणि सेफ्टी बेल्टच्या मदतीने नितीनभाईंना सुरक्षितपणे पकडून ठेवले.
सुमारे एक तास चाललेल्या अत्यंत काळजीपूर्वक आणि समन्वयाने केलेल्या रेस्क्यू ऑपरेशननंतर नितीनभाईंना सुरक्षित बाहेर काढण्यात यश आले. या घटनेत त्यांना दुखापत झाली असून, उपचारासाठी त्यांना तातडीने रुग्णालयात दाखल करण्यात आले आहे. त्यांची प्रकृती स्थिर असल्याचे सांगण्यात येत आहे.
नितीनभाई नेमके कसे खिडकीतून बाहेर पडले, याबाबत अद्याप स्पष्ट माहिती समोर आलेली नाही. पोलिस आणि संबंधित यंत्रणा या घटनेचा अधिक तपास करत आहेत. दरम्यान, एक पाय ग्रीलमध्ये अडकल्यामुळे जीव वाचल्याने ही घटना चमत्कारिक बचाव म्हणून ओळखली जात आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.