मुसळधार पावसात डॉ. दीपक अमरापूरकर बेपत्ता

जय महाराष्ट्र न्यूज, मुंबई

मुंबईत मंगळवारी झालेल्या मुसळधार पावसात बॉम्बे हॉस्पिटलचे गॅस्ट्रोएन्ट्रोलॉजिस्ट डॉ. दीपक अमरापूरकर बेपत्ता झाल्याची धक्कादायक घटना समोर आली आहे. डॉ. अमरापूरकर गेल्या १८ तासांपासून बेपत्ता असून याप्रकरणी दादर पोलीस ठाण्यात तक्रार नोंदविण्यात आली आहे. पोलिसांना केवळ त्यांची छत्री सापडली असून त्यांचा शोध घेण्यात येत आहे.

काल मुसळधार पावसामुळे वरळी ते परळ पर्यंतच्या परिसरात कमरेपर्यंत पाणी भरले होते. काही ठिकाणी तर गळ्यापर्यंत पाणी भरले होते. त्यामुळे अनेक लोकांनी कार आहे तिथेच सोडून पाण्यातून वाट काढत घरी जाणे पसंत केले. दुपारी साडेचारच्या सुमारास डॉ. दीपक अमरापूरकर हे सुद्धा हॉस्पिटलमधून प्रभादेवीला घराकडे जायला निघाले होते. पण आज सकाळ झाली तरी ते घरी पोहचले नसल्याचे त्यांच्या निकटवर्तीयांनी सांगितले.

अमरापूरकर दुपारी रूग्णालयातून निघाले होते. सायंकाळी साधारण ६.३० च्या सुमारास ते प्रभादेवीच्या दीपक सिनेमाजवळ पोहचले. त्या ठिकाणी प्रचंड पाणी तुंबले होते. त्यामुळे अमरापूरकर हे कारमधून उतरले आणि त्यांनी ड्रायव्हरला कार घरी आणण्यास सांगितले. त्यानंतर ते पुढे पाण्यातून मार्ग काढत चालत गेले. तथापी त्यांचा ड्रायव्हर घरी पोहचला. पण डॉक्टर घरी आले नाहीत. त्यांचा फोनही लागत नाही, असं बॉम्बे हॉस्पिटलचे डॉ. गौतम भन्साळी यांनी सांगितलं. धक्कादायक म्हणजे ते ज्या ठिकाणाहून गायब झाले ते ठिकाण त्यांच्या घरापासून १५ मिनिटांच्या अंतरावर असल्याचं भन्साळी यांचं म्हणणं आहे.