Ahilyanagar : अहिल्यानगर हादरलं! 50 विद्यार्थ्यांनी भरलेली स्कूलबस पलटी; 20 जण जखमी, एका विद्यार्थ्याची प्रकृती चिंताजनक
अहिल्यानगर: अहिल्यानगर जिल्ह्यातील राहुरी तालुक्यात आज सकाळी विद्यार्थ्यांनी भरलेल्या शाळेच्या बसचा भीषण अपघात झाला. भागरथीबाई माध्यमिक विद्यालयाची बस अचानक रस्त्याच्या कडेला कोसळून पलटी झाल्याने विद्यार्थ्यांमध्ये मोठी घबराट पसरली. या अपघातात १५ ते २० विद्यार्थी जखमी झाले असून, एका विद्यार्थ्याची प्रकृती गंभीर असल्याची प्राथमिक माहिती समोर आली आहे. सुदैवाने या दुर्घटनेत कोणतीही जीवितहानी झालेली नाही.
ही घटना राहुरी तालुक्यातील कोंढवड गावाजवळ घडली. शाळा सुटल्यानंतर विद्यार्थ्यांना घरी सोडण्यासाठी बस नियमित मार्गाने जात असताना अचानक बसच्या यांत्रिक भागात बिघाड झाला. प्राथमिक माहितीनुसार, बसचा पाटा तुटल्याने चालकाचे वाहनावरील नियंत्रण सुटले. बस थांबवण्याचा प्रयत्न करण्यात आला, मात्र तो अपयशी ठरला आणि बस रस्त्याच्या कडेला खाली जाऊन पलटी झाली.
अपघाताच्या वेळी बसमध्ये जवळपास ५० विद्यार्थी प्रवास करत होते. अचानक झालेल्या या घटनेमुळे बसमधील विद्यार्थ्यांनी भीतीने आरडाओरड सुरू केली. काही विद्यार्थी बसमध्ये अडकले होते. अपघाताची माहिती मिळताच स्थानिक नागरिकांनी घटनास्थळी धाव घेत तातडीने बचावकार्य सुरू केले. त्यांनी विद्यार्थ्यांना सुरक्षित बाहेर काढून जखमींना रुग्णालयात पोहोचवण्यासाठी मदत केली.
जखमी विद्यार्थ्यांना तातडीने जवळील खासगी रुग्णालयात दाखल करण्यात आले असून त्यांच्यावर उपचार सुरू आहेत. एका विद्यार्थ्याची प्रकृती गंभीर असल्याचे सांगितले जात आहे, तर इतर विद्यार्थ्यांची प्रकृती स्थिर असल्याची माहिती डॉक्टरांनी दिली आहे.
घटनेची माहिती मिळताच पोलीस, प्रशासन आणि शाळेचे अधिकारी घटनास्थळी दाखल झाले. अपघाताचे नेमके कारण शोधण्यासाठी तपास सुरू करण्यात आला आहे. बसच्या तांत्रिक स्थितीची तपासणीही केली जाणार असल्याचे प्रशासनाने स्पष्ट केले आहे.
या अपघातानंतर शाळेच्या बसच्या सुरक्षिततेचा मुद्दा पुन्हा ऐरणीवर आला आहे. विद्यार्थ्यांच्या वाहतुकीसाठी वापरण्यात येणाऱ्या वाहनांची नियमित तपासणी होत आहे का, याबाबत प्रश्न उपस्थित केले जात आहेत. पालकांमध्येही चिंतेचे वातावरण निर्माण झाले असून, शाळा प्रशासनाने सर्व पालकांशी संपर्क साधत विद्यार्थ्यांच्या प्रकृतीबाबत माहिती दिली आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.