Pandharpur Wari: अन् जीव वाचवाया आला विठ्ठ्ल…! धावत्या रेल्वेत चढताना वारकऱ्याचा गेला तोल; रेल्वे कर्मचाऱ्याच्या प्रसंगावधानामुळे टळला मोठा अनर्थ, प्रसंग CCTVमध्ये कैद

पंढरपूर वारीसाठी निघालेल्या एका वयोवृद्ध वारकऱ्याचे प्राण रेल्वे कर्मचाऱ्याच्या प्रसंगावधानामुळे थोडक्यात वाचल्याची घटना समोर आली आहे. धावत्या रेल्वेत चढण्याचा प्रयत्न करताना संबंधित वारकऱ्याचा तोल गेल्याने तो थेट रेल्वे रुळावर पडला. काही क्षणांसाठी स्थानक परिसरात एकच खळबळ उडाली.

प्रत्यक्षदर्शींच्या माहितीनुसार, वारकरी रेल्वेत चढत असताना त्यांचा पाय घसरला आणि ते रेल्वे व प्लॅटफॉर्मच्या मधील रुळावर कोसळले. त्याचवेळी कर्तव्यावर तैनात असलेल्या रेल्वे कर्मचाऱ्याने प्रसंगावधान राखत कोणताही विलंब न करता तातडीने धाव घेतली. त्यांनी जीवाची पर्वा न करता रुळावर उतरून वारकऱ्याला सुरक्षितपणे बाहेर काढले.

रेल्वे कर्मचाऱ्याच्या धाडसी आणि तत्पर कृतीमुळे मोठी दुर्घटना टळली. काही क्षणांचा विलंब झाला असता गंभीर अपघात घडण्याची शक्यता व्यक्त केली जात आहे. घटनेनंतर स्थानकावरील प्रवाशांनी कर्मचाऱ्याच्या धाडसाचे कौतुक केले. दरम्यान, हा संपूर्ण थरार स्थानकातील सीसीटीव्ही कॅमेऱ्यात कैद झाला आहे. या घटनेचा व्हिडिओ सोशल मीडियावर मोठ्या प्रमाणात व्हायरल होत असून, रेल्वे कर्मचाऱ्याच्या धाडसी कृतीचे सर्व स्तरांतून कौतुक होत आहे.

रेल्वे प्रशासनाकडूनही प्रवाशांना धावत्या रेल्वेत चढण्याचा किंवा उतरण्याचा प्रयत्न करू नये, तसेच स्वतःच्या सुरक्षिततेची काळजी घ्यावी, असे आवाहन करण्यात आले आहे.