PM Narendra Modi: ऑपरेशन सिंदूरची वर्षपूर्ती; पंतप्रधान नरेंद्र मोदींनी बदलला सोशल मीडियावरील ‘प्रोफाईल फोटो’
नवी दिल्ली: आज 7 मे 2026 रोजी भारताच्या इतिहासात एका गौरवशाली प्रकरणाला एक वर्ष पूर्ण झाले आहे. गेल्या वर्षी भारताने पहलगाम येथील दहशतवादी हल्ल्याचा वचपा काढण्यासाठी पाकिस्तानमधील दहशतवादी तळांवर भीषण हल्ला केला होता. या मोहिमेला ‘ऑपरेशन सिंदूर’ असे नाव देण्यात आले होते. या ऐतिहासिक दिनाचे औचित्य साधून पंतप्रधान नरेंद्र मोदी यांनी त्यांच्या सोशल मीडिया प्लॅटफॉर्म ‘X’ (ट्विटर) वरील डीपी (Display Profile) बदलून ऑपरेशन सिंदूरचा लोगो लावला आहे. या लोगोवर भारताचा तिरंगा अभिमानाने डोलताना दिसत आहे.
पंतप्रधान मोदींकडून भारतीय सैन्याचे कौतुक
ऑपरेशन सिंदूरच्या पहिल्या वर्धापनदिनानिमित्त पंतप्रधान मोदींनी सशस्त्र दलांच्या शौर्याला सलाम केला. ते म्हणाले की, “एक वर्षापूर्वी ऑपरेशन सिंदूर दरम्यान आपल्या सैन्याने अतुलनीय साहस आणि अचूकतेचे प्रदर्शन केले. पहलगाममध्ये निष्पाप भारतीयांवर हल्ला करण्याचे धाडस करणाऱ्यांना त्यांनी चोख प्रत्युत्तर दिले. आज संपूर्ण देश आपल्या जवानांच्या शौर्याला अभिवादन करत आहे. हा ऑपरेशन भारताच्या राष्ट्रीय सुरक्षेप्रती असलेल्या अतूट वचनबद्धतेचे प्रतीक आहे.”
A year ago, during #OperationSindoor, our armed forces showcased their valour and gave a firm response to those who attacked our people. Every Indian is proud of our armed forces. As a mark of respect to our forces and their success during #OperationSindoor, let us all change our… pic.twitter.com/w4A3j1bGTw — Narendra Modi (@narendramodi) May 7, 2026
दहशतवादाच्या विरोधात भारताचा ठोस निर्धार
पंतप्रधानांनी पुढे नमूद केले की, ऑपरेशन सिंदूरने भारतीय लष्कराची व्यावसायिकता आणि सज्जता जगासमोर आणली आहे. तसेच संरक्षण क्षेत्रातील भारताची ‘आत्मनिर्भरता’ आणि तिन्ही दलांमधील वाढता समन्वय यामुळे राष्ट्रीय सुरक्षा किती मजबूत झाली आहे, हे या मोहिमेने अधोरेखित केले. आज एक वर्षानंतरही आम्ही दहशतवादाचा आणि त्याला पाठबळ देणाऱ्या यंत्रणेचा नायनाट करण्याच्या संकल्पावर ते ठाम आहोत, असा इशाराही त्यांनी शत्रू राष्ट्रांना दिला.
‘ऑपरेशन सिंदूर राष्ट्रीय संकल्पाचे प्रतीक’
संरक्षण मंत्री राजनाथ सिंह यांनीही या प्रसंगी जवानांच्या बलिदानाला नमन केले. ते म्हणाले की, “या मोहिमेने आधुनिक लष्करी कारवायांसाठी एक नवा आदर्श घालून दिला आहे. तिन्ही दलांमधील सखोल समन्वय आणि अचूकतेमुळे ही मोहीम यशस्वी झाली. ऑपरेशन सिंदूर हे दर्शवते की, भारतीय सैन्य कोणत्याही आव्हानाला तोंड देण्यासाठी आणि निर्णायक कारवाई करण्यासाठी नेहमीच सज्ज आहे. हे भारताच्या स्वावलंबनाचे आणि सामर्थ्याचे जिवंत उदाहरण आहे.”
On the anniversary of Operation Sindoor, we salute the valour and sacrifices of our armed forces, whose courage and dedication continue to safeguard the nation. Their actions during the operation reflected unmatched precision, seamless jointness and deep synergy across services,… pic.twitter.com/r8pVDnEoYV — Rajnath Singh (@rajnathsingh) May 7, 2026
गृहमंत्री अमित शाह यांचा कडक इशारा
गृहमंत्री अमित शाह यांनी या मोहिमेचा उल्लेख ‘ऐतिहासिक मिशन’ असा केला. ते म्हणाले की, “ऑपरेशन सिंदूर आपल्या शत्रूंना भारतीय लष्कराच्या अचूक आणि मारक क्षमतेची आठवण करून देत राहील. आमच्या गुप्तचर यंत्रणांची माहिती, सैन्याचे शौर्य आणि प्रबळ राजकीय इच्छाशक्ती जेव्हा एकत्र येते, तेव्हा काय घडू शकते, हे या मोहिमेने दाखवून दिले आहे. शत्रू कुठेही लपला तरी तो वाचू शकत नाही, तो नेहमीच आमच्या नजरेत आणि भीषण मारक क्षमतेच्या टप्प्यात असेल, हा संदेश या दिवसाने दिला आहे.”
काय होते ऑपरेशन सिंदूर?
पहलगाम येथे झालेल्या भ्याड दहशतवादी हल्ल्याचा बदला घेण्यासाठी भारताने हे ऑपरेशन राबवले होते. अवघ्या 3 दिवसांत भारताने पाकिस्तानच्या कुरापतींना उत्तर देत त्यांना गुडघे टेकण्यास भाग पाडले होते. या मोहिमेने भारताची लष्करी ताकद आणि दहशतवादाच्या विरोधात असलेले ‘झिरो टॉलरन्स’ धोरण पुन्हा एकदा स्पष्ट केले. आज संपूर्ण देशात या पराक्रमाचा गौरव केला जात असून समाजमाध्यमांवरही ‘ऑपरेशन सिंदूर’ ट्रेंड होताना दिसत आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.