गावात झाला मोठा स्फोट! 55 जणांचा मृत्यू, 70 पेक्षा अधिकजण जखमी, बचावकार्य युद्धपातळीवर सुरू

म्यानमारच्या शान राज्यात झालेल्या एका मोठ्या स्फोटात किमान ५५ जण ठार झाले आणि अनेक जण जखमी झाले. स्थानिक माध्यमांनुसार, ही दुर्घटना रविवारी दुपारी चीन सीमेजवळील नामखाम टाउनशिपच्या काउंग तात गावात घडली. बंडखोर गट ता'आंग नॅशनल लिबरेशन आर्मी (टीएनएलए) ने दावा केला आहे की, खाणकामासाठी साठवलेल्या स्फोटकांचा निष्काळजीपणाने झालेल्या स्फोटामुळे हा धमाका झाला.

स्थानिक वृत्तांनुसार, स्फोट इतका शक्तिशाली होता की त्यामुळे जवळच्या अनेक घरांचे मोठे नुकसान झाले. भिंती कोसळल्या, तर काही पूर्णपणे उद्ध्वस्त झाल्या. प्रत्यक्षदर्शींच्या मते, स्फोटाचा आवाज अनेक किलोमीटर दूरपर्यंत ऐकू आला. स्फोटामुळे संपूर्ण परिसरात घबराट पसरली आणि लोक जीव वाचवण्यासाठी सैरावैरा पळू लागले.

प्रसारमाध्यमांच्या वृत्तानुसार, या स्फोटामुळे संपूर्ण गावात प्रचंड विध्वंस झाला आहे. मृतांमध्ये २५ महिला आणि ३० पुरुषांचा समावेश आहे. या दुर्घटनेनंतर मदत आणि बचाव कार्य सुरू आहे. बचाव पथके ढिगाऱ्याखाली अडकलेल्या लोकांचा शोध घेत आहेत, तर नुकसान झालेल्या इमारती आणि उद्ध्वस्त घरांमधून मृतदेह बाहेर काढले जात आहेत. स्थानिक प्रसारमाध्यमांनुसार, या स्फोटात १०० हून अधिक घरांचे नुकसान झाले आहे. गावाचा एक भाग पूर्णपणे उद्ध्वस्त झाला असून, अनेक कुटुंबे बेघर झाली आहेत.

टेलिग्रामवर प्रसिद्ध केलेल्या एका निवेदनात, टीएनएलएची राजकीय शाखा असलेल्या पलाउंग स्टेट लिबरेशन फ्रंटने मृतांच्या कुटुंबीयांप्रति शोक व्यक्त केला आणि या घटनेची चौकशी करण्याची घोषणा केली. संघटनेने म्हटले आहे की, स्फोटाचे कारण निश्चित करण्यासाठी तपास सुरू असून, जबाबदार असलेल्यांवर कठोर कारवाई केली जाईल. टीएनएलएने पीडित कुटुंबांना सर्वतोपरी मदतीचे आश्वासन दिले आहे.