मुंबई विद्यापीठाच्या कुलगुरूंची आज घोषणा

जय महाराष्ट्र न्युज, मुंबई

मुंबई विद्यापीठाच्या नव्या कुलगुरूंच्या नावाची घोषणा आता अंतिम टप्प्यात आली आहे. शोध समितीने निवडलेले अंतिम पाच उमेदवार राजभवनात राज्यपाल सी. विद्यासागर राव यांच्याकडे सादरीकरण करणार असून त्यानंतर अंतिम उमदेवारांची निवड केली जाणार आहे. त्यामुळे विद्यापीठाच्या कुलगुरूपदाचा पदभार  कोणाकडे येणार, याकडे सर्वांचे लक्ष लागून राहिले आहे.

डॉ. संजय देशमुख यांना मुंबई विद्यापीठाच्या कुलगुरूपदावरून दूर केल्यानंतर नव्या कुलगुरूंच्या निवडीसाठी ज्येष्ठ शास्त्रज्ञ डॉ. कस्तुरीरंगन यांच्या अध्यक्षतेखाली शोध समिती नेमण्यात आली होती. या समितीने गेल्याच आठवड्यात अंतिम पाच जणांची नावे राज्यपालांकडे सुपूर्द केली होती. त्यानुसार या पाच जणांना अंतिम सादरीकरणासाठी आज, गुरुवारी राजभवनात आमंत्रित करण्यात आले असून सकाळी ११.३०पासून हे सादरीकरण सुरू होईल. त्यानंतर राज्यपाल सी. विद्यासागर राव अंतिम नाव जाहीर करतील. त्यामुळे नव्या कुलगुरूंचे नाव आज गुरुवारीच जाहीर होईल, असे जवळपास निश्चितच मानले जात आहे.

दरम्यान, राजभवनात सादरीकरण करण्यासाठी कोणत्या अंतिम पाच जणांची निवड झाली आहे, याबाबत बुधवारीही चर्चेला उधाण आले होते. याबाबत कोणतीही अधिकृत माहिती देण्यास राजभवनाकडून नकार देण्यात आल्याने लोकांची उत्सुकता शिगेला पोहचली आहे. सध्या विद्यापीठात सुरू असलेल्या गोंधळाची परीक्षा नव्या कुलगुरूंना द्यावी लागणार असल्याने या पदावर कोणाची वर्णी लागते, हे पाहणे उत्सुकतेचे ठरणार आहे