Moshi Accident: मोशी दुर्घटनेचा थरकाप उडवणारा शेवट! 83 तासांच्या अथक शोधमोहीमेनंतर 9 जणांचे मृतदेह बाहेर; कचऱ्याच्या ढिगाऱ्याने उद्ध्वस्त केली अनेक कुटुंबे
पिंपरी-चिंचवडमधील मोशी येथील 'वेस्ट टू एनर्जी' प्रकल्पात घडलेल्या भीषण दुर्घटनेने संपूर्ण महाराष्ट्र हादरला आहे. कचऱ्याचा प्रचंड ढिगारा प्रशासकीय इमारतीवर कोसळल्याने अनेक कर्मचारी ढिगाऱ्याखाली अडकले. या घटनेनंतर तब्बल ८३ तास अखंड सुरू असलेली बचावमोहीम अखेर पूर्ण झाली असून या दुर्घटनेत नऊ कर्मचाऱ्यांचा दुर्दैवी मृत्यू झाल्याची अधिकृत माहिती समोर आली आहे.
८ जुलै रोजी दुपारच्या सुमारास ही दुर्घटना घडली. अचानक कोसळलेल्या कचऱ्याच्या ढिगाऱ्यामुळे संपूर्ण इमारत काही क्षणांत गाडली गेली. त्यावेळी एकूण २३ जण घटनास्थळी होते. त्यापैकी पाच जणांनी प्रसंगावधान राखत स्वतःचा जीव वाचवला, तर उर्वरित कर्मचारी ढिगाऱ्याखाली अडकले.
घटनेची माहिती मिळताच भारतीय सेना, राष्ट्रीय आपत्ती प्रतिसाद दल (NDRF), पिंपरी-चिंचवड महापालिका, अग्निशमन दल, पोलीस आणि इतर यंत्रणांनी संयुक्त बचावमोहीम सुरू केली. मोठ्या प्रमाणात यंत्रसामग्री, डॉग स्क्वॉड, लाईव्ह डिटेक्टर, साउंड डिटेक्टर तसेच पोकलेन आणि डंपरच्या मदतीने शोधकार्य रात्रंदिवस सुरू ठेवण्यात आले.
हेही वाचा: Pravin Darekar: 'तुमची उंची आणि कुवत किती?'; प्रवीण दरेकरांचा बच्चू कडू यांच्यावर निशाणा
दुर्घटनेच्या पहिल्याच दिवशी शोधपथकाला मोठे यश मिळाले. ढिगाऱ्याखालून नऊ जणांची सुखरूप सुटका करण्यात आली. मात्र त्यानंतर अडकलेल्या इतर कर्मचाऱ्यांचा शोध घेण्यासाठी सुरू असलेले प्रयत्न अधिक कठीण होत गेले. ढिगाऱ्याखाली जीवंत व्यक्ती असल्याची शक्यता तपासण्यासाठी आधुनिक उपकरणांचा वापर करण्यात आला. परंतु कोणताही प्रतिसाद न मिळाल्याने नातेवाईकांची चिंता अधिक वाढली.
दुसऱ्या दिवशी ढिगाऱ्यातून पहिला मृतदेह बाहेर काढण्यात आला. त्यानंतर इमारतीच्या काँक्रीटचा भाग तोडून आत पोहोचण्यासाठी विशेष मोहीम राबवण्यात आली. ११ जुलैदरम्यान सलग सात मृतदेह बाहेर काढण्यात आले. अखेर १२ जुलैच्या पहाटे शेवटच्या बेपत्ता कर्मचाऱ्याचा मृतदेहही सापडल्यानंतर ८३ तास चाललेली शोधमोहीम अधिकृतरीत्या समाप्त करण्यात आली.
या संपूर्ण मोहिमेत सुमारे ९० जवानांनी सहभाग घेतला. प्रत्येक क्षणाशी शर्यत करत बचाव पथकाने अथक परिश्रम घेतले. मात्र सर्व बेपत्ता व्यक्तींना जिवंत बाहेर काढण्याचे प्रयत्न अखेर अपयशी ठरले. या दुर्घटनेत अनेक कुटुंबांनी आपल्या जवळच्या व्यक्तींना गमावले असून परिसरात शोककळा पसरली आहे.
या घटनेनंतर प्रकल्पातील सुरक्षितता, कचरा व्यवस्थापनाची पद्धत आणि प्रशासनाच्या जबाबदारीवर प्रश्नचिन्ह उपस्थित केले जात आहे. दुर्घटनेमागील कारणांचा सखोल तपास सुरू असून जबाबदारांवर कारवाईची मागणीही जोर धरू लागली आहे.
मोशीतील हा अपघात केवळ एका औद्योगिक दुर्घटनेपुरता मर्यादित नसून, सुरक्षा नियमांकडे दुर्लक्ष केल्यास किती मोठी किंमत मोजावी लागू शकते, याची तीव्र जाणीव करून देणारी घटना ठरली आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.