Maratha Reservation: ‘आमचा पैसा इथे गुंतलेला आहे; आंदोलनाचा परिणाम आमच्या…’; आंदोलकांचा BSE इमारतीत घुसण्याचा प्रयत्न
मुंबईत मराठा आरक्षणासाठी सुरू असलेले आंदोलन सध्या तीव्र स्वरूप घेत आहे. मराठा समाजाचे नेते मनोज जरांगे पाटील आझाद मैदानावर उपोषणाला बसले असून आज त्यांचा चौथा दिवस आहे. 29 ऑगस्टपासून लाखो मराठा आंदोलक मुंबईत दाखल झाले आहेत, ज्यामुळे शहरातील वाहतूक आणि दैनंदिन जीवनावर गंभीर परिणाम झाला आहे.
आज सकाळपासून सीएसएमटी परिसरात कमालीची गर्दी झाली आहे. एकीकडे सामान्य नागरिक ऑफिसला पोहचण्याचा प्रयत्न करत आहेत, तर दुसरीकडे आंदोलकांनी सीएसएमटीवर मोठी उपस्थिती दर्शवली आहे. आंदोलकांकडून रस्त्यावर नृत्य आणि विविध प्रकारचे कार्यक्रम सुरू असताना, काही आंदोलक शेअर मार्केटच्या इमारतीमध्ये घुसण्याचा प्रयत्न करताना दिसले.
आंदोलनकर्त्यांनी सांगितले की, ‘आम्ही देखील शेअर होल्डर आहोत, आमचं पैसा या मार्केटमध्ये गुंतलेलं आहे. आम्हाला शेअर मार्केट कार्यालय पाहण्याचा पूर्ण अधिकार आहे. आमच्या आंदोलनामुळे काहीही परिणाम होऊ शकतो, म्हणून आम्ही मार्केटची स्थिती जाणून घेण्यासाठी आलो होतो.’ यानंतर आंदोलकांनी इमारतीबाहेर घोषणाबाजी सुरू केली. सुरक्षारक्षकांनी वेळेत हस्तक्षेप करून परिसरात शांतता राखली, पण या घटनेमुळे मुंबईतील मुख्य आर्थिक क्षेत्रावर तणाव निर्माण झाला.
मराठा आंदोलनाला महाराष्ट्रभरातून मोठ्या संख्येने मदत मिळत आहे. उपोषणात सहभागी आंदोलकांना भाकरी, चपाती, तांदूळ, गहू, पाणी, बिस्किटे, मसाले, लोणचे अशा विविध आवश्यक वस्तू पाठवल्या जात आहेत. खेडेगावातील शेतकरी बांधवही मदतीस पाठवत आहेत, ज्यामुळे आंदोलनकर्त्यांना उपासमार टाळता येईल.
मनोज जरांगे पाटील यांनी गंभीर आरोप केला की, ‘गळ्यात भगवे रुमाल आणि टोप्या घालून 40-50 पोलीस आमच्यात शिरले. ते आंदोलकांच्या गाड्या माघारी पाठवत आहेत. आम्ही त्यांना माघारी जाण्यास सांगितलं, मात्र या पोलीसांना निलंबित करावे.’ त्यांनी या आंदोलनादरम्यान पोलिसांवर आणि प्रशासनावरही टीका केली. तसेच जरांगे पाटील यांनी स्पष्ट केले की, जर आम्ही गावात गेलो तर आमदारांची आणि खासदारांची अवस्था राज्यात वाईट होईल, अशी इशारा देखील दिला.
एकंदरीत पाहता, मुंबईत मराठा आंदोलनामुळे तणाव निर्माण झाला असून, मनोज जरांगे पाटील यांच्या नेतृत्वाखाली आंदोलनकर्ते आपला मुद्दा ठामपणे मांडत आहेत. शेअर मार्केटमध्ये घुसण्याचा प्रयत्न आणि घोषणाबाजीमुळे आर्थिक क्षेत्रावर तणाव निर्माण झाला आहे, तर राज्यभरातून मदतीचा ओघ आंदोलनाला अधिक टिकवून ठेवतो. प्रशासन आणि पोलीस यांच्यासह नागरिकांनाही परिस्थिती समजून घ्यावी लागणार आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.