गोंदियात 3 लाख 61 हजार लाडक्या बहिणींचे अर्ज मंजूर

गोंदिया: गोंदिया जिल्ह्यात मुख्यमंत्री माझी लाडकी बहीण योजनेअंतर्गत 3 लाख 61 हजार 216 लाडक्या बहिणींचे अर्ज मंजूर करण्यात आले आहेत. या योजनेचा लाभ घेणाऱ्या बहिणींच्या मासिक अनुदानात मोठी वाढ करण्यात आली आहे. राज्य सरकारने या योजनेअंतर्गत प्रतिमहिना 1,500 रुपयांच्या ऐवजी 2,100 रुपये देण्याची घोषणा केली आहे. त्यामुळे गोंदियातील बहिणी आता 2,100 रुपयांच्या अनुदानाच्या प्रतीक्षेत आहेत.

या योजनेची लोकप्रियता वाढल्याने गोंदिया जिल्ह्यात अर्ज करणाऱ्या लाभार्थ्यांची संख्या लक्षणीय वाढली आहे. 73 हजार 734 नव्या लाभार्थ्यांचा समावेश दोन महिन्यांत झाला आहे. तथापि, 1,571 अर्ज अपात्र ठरले आहेत आणि 12,000 हून अधिक अर्जांमध्ये त्रुटी आढळल्या आहेत, ज्यामुळे त्या अर्जांची प्रक्रिया पूर्ण होऊ शकलेली नाही.

लाडक्या बहिणींच्या खात्यावर लवकरच दोन महिन्यांचे अनुदान जमा केले जाणार असल्याने त्या बहिणींच्या नजरा याच अनुदानावर लागल्या आहेत. राज्य सरकारने या योजनेतून महिलांना आर्थिक मदत देऊन त्यांचा सशक्तीकरण साधण्याचा प्रयत्न केला आहे.