Godavari Boat Accident: गोदावरीत क्षणात घडला अनर्थ! 40 प्रवाशांनी भरलेली बोट बुडाली, दोन महिलांचा दुर्दैवी मृत्यू
जालना आणि बीड जिल्ह्यांना जोडणाऱ्या गोदावरी नदीत मंगळवारी सकाळी घडलेल्या एका दुर्घटनेने परिसर हादरून गेला. गोळेगाव येथून पुरुषोत्तमपुरीकडे निघालेली प्रवासी बोट नदीच्या मध्यभागी असताना अचानक पाण्यात बुडाली. या दुर्घटनेत दोन महिलांचा मृत्यू झाला असून अनेक प्रवाशांचा थरारक बचाव करण्यात आला.
स्थानिक नागरिकांच्या माहितीनुसार, गोळेगाव आणि पुरुषोत्तमपुरी या गावांदरम्यान नदी ओलांडण्यासाठी अनेक वर्षांपासून बोटीचा वापर केला जातो. मंगळवारी सकाळीही मोठ्या संख्येने नागरिक या बोटीतून प्रवास करत होते. बोटीत सुमारे 40 प्रवासी असल्याचे सांगितले जात आहे. मात्र नदीच्या मध्यभागी पोहोचताच बोटीचा तोल गेला आणि काही क्षणांतच ती पाण्यात बुडाली.
घटनेनंतर प्रवाशांमध्ये एकच गोंधळ उडाला. अनेकांनी जीव वाचवण्यासाठी नदीत उड्या मारल्या, तर काही जण मदतीसाठी ओरडू लागले. सुदैवाने परिसरातील ग्रामस्थांनी प्रसंगावधान राखत तातडीने बचावकार्य सुरू केले. अनेक स्थानिक युवकांनी नदीत उतरून प्रवाशांना सुरक्षित किनाऱ्यावर आणण्याचे धाडस दाखवले.
दुर्घटनेची माहिती मिळताच पोलीस, महसूल प्रशासन आणि आरोग्य विभागाचे अधिकारी घटनास्थळी दाखल झाले. जखमींना तातडीने उपचारासाठी रुग्णालयात हलवण्यात आले. या घटनेत 12 महिलांना उपचारासाठी आष्टी येथील ग्रामीण रुग्णालयात दाखल करण्यात आले असून त्यांची प्रकृती सध्या स्थिर असल्याचे प्रशासनाने सांगितले आहे.
या दुर्घटनेत कांता ज्ञानदेव आंधळे (रा. कुंबेफळ, ता. सिंदखेड राजा, जि. बुलढाणा) आणि प्रमिला शेषराव राठोड (रा. चोरपांग्रा, ता. लोणार, जि. बुलढाणा) या दोन महिलांचा मृत्यू झाला. या घटनेमुळे त्यांच्या कुटुंबीयांवर दुःखाचा डोंगर कोसळला आहे.
दरम्यान, प्राथमिक चौकशीत धक्कादायक बाब समोर आली आहे. प्रवाशांच्या वाहतुकीसाठी वापरण्यात आलेली बोट मूळतः वाळू उपसा करण्यासाठी असल्याची माहिती समोर येत आहे. तसेच बोटीत क्षमतेपेक्षा अधिक प्रवासी बसवण्यात आल्याची शक्यता व्यक्त केली जात आहे. त्यामुळे सुरक्षेच्या नियमांचे पालन करण्यात आले होते का, याबाबत प्रश्न उपस्थित होत आहेत.
या घटनेनंतर नदीमार्गे होणाऱ्या प्रवासी वाहतुकीच्या सुरक्षेचा मुद्दा पुन्हा एकदा ऐरणीवर आला आहे. नागरिकांनी या प्रकरणाची सखोल चौकशी करून जबाबदारांवर कठोर कारवाई करण्याची मागणी केली आहे. प्रशासनानेही दुर्घटनेचा तपास सुरू केला असून सर्व बाबींची पडताळणी केली जात आहे.
गोदावरी नदीतील या दुर्घटनेने संपूर्ण परिसरात हळहळ व्यक्त केली जात असून, भविष्यात अशा घटना टाळण्यासाठी अधिक कडक सुरक्षा उपायांची गरज असल्याची भावना नागरिकांकडून व्यक्त केली जात आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.