गणेश नाईकांना दिलासा नाहीच

भाजप आमदार गणेश नाईक यांच्या अंतरिम जामिनावर आज सुनावणी पार पडली. दरम्यान, गणेश नाईकांना दिलासा मिळालेला नसून पुढील सुनावणी ३० एप्रिल रोजी होणार आहे. गणेश नाईकप्रकरणी २ खटल्यातील जामिनावर न्यायालयाकडे वेळ नसल्याने सुनावणी पुढे ढकलण्यात आली आहे. त्यामुळे गणेश नाईक यांच्यावर अटकेची तांगती तलवार आहे.

भाजप आमदार गणेश नाईक यांच्यावर दीपा चौहान या महिलेने बलात्काराचा आरोप केला आहे. त्यामुळे त्यांच्याविरोधात बलात्काराचा गुन्हा दाखल झाला आहे. दरम्यान, याप्रकरणी गणेश नाईक यांनी अटकपूर्व जामीनासाठी न्यायालयात धाव घेतली आहे. नाईकांनी वकिलांमार्फत ठाणे सत्र न्यायालयात अर्ज दाखल केला. याप्रकरणी सत्र न्यायालयात सुनावणी पार पडली असून न्यायालयाने त्यांना दिलासा दिलेला नाही. याप्रकरणी पुढील सुनावणी ३० एप्रिल रोजी होणार आहे.

काय आहे प्रकरण?

भाजप आमदार गणेश नाईक यांच्यावर २७ वर्ष लिव्ह इन रिलेशनशिपमध्ये राहण्याचा दावा करणाऱ्या महिलेने हा गुन्हा दाखल केला आहे. नाईक यांच्यासोबत २७ वर्ष लिव्ह इनमध्ये राहून त्यांच्याकडून मला एक मुलगा आहे, परंतु ते त्याचा स्वीकार करण्यास नकार देत असल्यामुळे संबंधित महिलेने त्यांच्यावर बलात्काराचा आरोप केला आहे.
पोलिसांत तक्रार दाखल केल्यानंतर नाईकांवर कारवाई न झाल्यामुळे पीडित महिलेने महाराष्ट्र महिला आयोगाकडे धाव घेतली. त्यानंतर राज्य महिला आयोगाच्या निर्देशानंतर पोलिसांनी गणेश नाईक यांच्याविरोधात बलात्काराच गुन्हा दाखल केला आहे.