Delhi Air Pollution: दिल्लीतील हवा धोक्याच्या पातळीवर; ऑफिस कामकाजासाठी ‘वर्क फ्रॉम होम’ तर शाळांसाठी ‘हायब्रिड’ वर्गांचे आदेश

नवी दिल्ली: दिल्लीतील वाढत्या वायू प्रदूषणामुळे राजधानीची हवा अत्यंत धोकादायक पातळीवर पोहोचली आहे. परिस्थिती नियंत्रणात आणण्यासाठी प्रशासनाने ग्रेडेड रिस्पॉन्स अ‍ॅक्शन प्लॅन टप्पा 4 (GRAP-IV) लागू केला आहे. या पार्श्वभूमीवर विद्यार्थ्यांचे आरोग्य लक्षात घेऊन शिक्षण संचालनालयाने शाळांसाठी महत्त्वाचे निर्देश जारी केले आहेत. शनिवार (13 डिसेंबर) पासून दिल्लीतील इयत्ता 9 वी आणि 11 वीच्या विद्यार्थ्यांसाठी हायब्रिड शिक्षण पद्धत राबवण्याचे आदेश देण्यात आले आहेत. यामध्ये ऑनलाइन (Online) आणि प्रत्यक्ष (Offline) अशा दोन्ही प्रकारच्या वर्गांचा समावेश असेल. वायू गुणवत्ता व्यवस्थापन आयोगाने (Commission for Air Quality Management, CAQM) NCR परिसरात प्रदूषण रोखण्यासाठी GRAP-IV अंतर्गत कडक उपाययोजना सुरू केल्यानंतर हा निर्णय घेण्यात आला आहे.

दरम्यान, शनिवारी दिल्लीमध्ये यंदाचा सर्वात खराब एअर क्वालिटी इंडेक्स (AQI) नोंदवला गेला. 24 तासांचा सरासरी AQI 431 पर्यंत पोहोचला असून, यापूर्वी 11 नोव्हेंबर रोजी नोंदवलेला 428 चा आकडाही यामुळे मागे पडला आहे. प्रारंभिक इशारा प्रणालीनुसार (Early Warning System), रविवार (14 डिसेंबर) रोजीही हवा अत्यंत गंभीर श्रेणीत राहण्याची शक्यता आहे.

हेही वाचा: Share Market Holidays 2026: पुढच्या वर्षी शेअर बाजार 'इतक्या' दिवस बंद राहणार; NSE ने जाहीर केली सुट्ट्यांची यादी

शिक्षण संचालनालयाचे हे आदेश एनडीएमसी (NDMC), एमसीडी (MCD) आणि दिल्ली कॅन्टोनमेंट बोर्ड (Delhi Cantonment Board) अंतर्गत येणाऱ्या सरकारी, अनुदानित तसेच खासगी शाळांना लागू असतील. पुढील आदेश येईपर्यंत शाळांनी प्रत्यक्ष आणि ऑनलाइन दोन्ही प्रकारचे वर्ग सुरू ठेवावेत, असे स्पष्ट करण्यात आले आहे.

याशिवाय, वाढत्या प्रदूषणावर नियंत्रण ठेवण्यासाठी सरकारी कार्यालयांमध्ये वर्क फ्रॉम होम (Work From Home) लागू करण्यात आले आहे. 50 टक्क्यांपेक्षा जास्त कर्मचारी कार्यालयात उपस्थित राहणार नाहीत, तर उर्वरित कर्मचाऱ्यांना घरून काम करावे लागणार आहे. प्रशासकीय सचिव आणि विभागप्रमुखांना मात्र आवश्यकतेनुसार कार्यालयात उपस्थित राहणे बंधनकारक असेल. खासगी कार्यालयांनाही प्रत्यक्ष उपस्थिती 50 टक्क्यांपर्यंत मर्यादित ठेवण्याचे निर्देश देण्यात आले आहेत.

मात्र रुग्णालये, अग्निशमन सेवा (Fire Services), सार्वजनिक वाहतूक (Public Transport), वीज, पाणी, स्वच्छता, आपत्ती व्यवस्थापन (Disaster Management) तसेच प्रदूषण नियंत्रणाशी संबंधित अत्यावश्यक विभागांना या निर्बंधांमधून सूट देण्यात आली आहे. राजधानीतील अत्यावश्यक सेवा सुरळीत सुरू राहाव्यात, यासाठी ही व्यवस्था कायम ठेवण्यात येणार आहे.

हेही वाचा: Vijay Hazare Trophy: विराट कोहली आणि ऋषभ पंत विजय हजारे ट्रॉफीमध्ये खेळणार; 'या' मैदानावर रंगणार सामना