Devendra Fadnavis : ‘अशा नराधमांवर जरब बसवायची असेल तर….’; नसरापूरप्रकरणी मुख्यमंत्री देवेंद्र फडणवीस यांचं विधानसभेत निवेदन सादर

मुंबई : भोर तालुक्यातील नरसापूर येथे तीन वर्षाच्या चिमुकलीवर अत्याचार करून तिची निर्घृण हत्या करण्यात आली होती. या प्रकरणात न्यायालयाने आरोपी भीमराव कांबळे याला मरेपर्यंत फाशीची शिक्षा ठोठावली आहे. याआधी 26 जून रोजी न्यायालयाने भीमराव कांबळेला दोषी ठरवण्यात आले होते. दरम्यान, सर्व स्तरातून न्यायालयाच्या या निर्णयाचे स्वागत होत असून मुख्यमंत्री देवेंद्र फडणवीस यांनीदेखील आपली प्रतिक्रिया दिली आहे. मुख्यमंत्र्यांनी विधानसभेत याप्रकरणी एक निवेदन सादर केले. त्यांनी त्यांनी या निकालाबाबत समाधान व्यक्त केले आहे. अतिशय कमी कालावधीत पोलिसांनी या प्रकरणाचा तपास केला. पुरावे गोळा केले. न्यायालयानेही सलग सुनावणी घेऊन निकाल दिला, असे म्हणत फडणवीस यांनी सर्वांचे आभार मानले.

हेही वाचा : Nasrapur Case: 'दया दाखवण्यासारखे एकही कारण नाही, आता फासावर…' कोर्टाचा निकाल ऐकल्यानंतर काय होती आरोपीची प्रतिक्रिया?

काय म्हणाले मुख्यमंत्री देवेंद्र फडणवीस

नसरापूरच्या घटनेनंतर अवघ्या 14 दिवसांमध्ये 16 मे 2026 रोजी या प्रकरणात आरोपपत्र दाखल केले. 28 मे 2026 रोजी या न्यायालयासमोर आरोप निश्चिती झाली. 26 मे 2026 रोजी पहिली साक्ष नोंदवण्यात आली. केवळ 16 दिवसात 55 साक्षीदारांची तपासणी, उलटतपासणी करण्यात आली. त्यानंतर 25 जून 2026 रोजी न्यायालयाने या आरोपीला दोषी म्हणून जाहीर केले. म्हणजेच जवळपास घटना घडल्यानंतर 55 व्या दिवशी आरोपीला दोषी ठरवलं. त्यानंतर 29 जून रोजी आरोपीला तिहेरी फाशीची शिक्षा न्यायालयाने दिलेली आहे.  केवळ 29 दिवसात 55 साक्षीदार तपासून सर्व प्रक्रिया पूर्ण होऊन फाशीची शिक्षा झालेली आहे. मी न्यायालयाचे विशेष आभार मानतो. कारण आरोपपत्र दाखल करण्यापर्यंत प्रकरण पोलिसांच्या हातात असते. त्यानंतर संबंधित प्रकरण हे न्यायालयाच्या हातात असते. म्हणूनच मी न्यायमूर्ती एस. आर. साळुंखे यांचे मी विशेष आभार मानतो. कारण या प्रकरणाची सलग सुनावणी घेण्यासाठी त्यांनी त्यांच्या सुट्ट्यादेखील रद्द केल्या. अशा प्रकारच्या नराधमांवर आपल्याला कारवाई करायची असेल. जरब बसवायची असेल तर वेळेत न्याय मिळणं गरजेचं आहे. न्यायालयाने या प्रकरणात एक नवं उदाहरण मांडलं आहे. या प्रकरणावर काम करणारे एसपी संदीपसिंग गील, त्यांच्या नेतृत्त्वात काम करणारे इतर अधिकारी यांचे मी अभिनंदन करतो. कारण त्यांनी अतिशय चांगल्या पद्धतीने पुरावे गोळा केले. सर्व पुरावे ग्राह्य धरण्यात आले, असे म्हणत त्यांनी न्यायसंस्था, पोलीस यंत्रणा यांचेही आभार मानले.