बॉलिवूडची ‘हवाहवाई’ काळाच्या पडद्याआड

वृत्तसंस्था, मुंबई

प्रसिध्द अभिनेत्री बॉलिवूडची हवाहवाईने वयाच्या 54 व्या वर्षी अखेरचा श्वास घेतला आहे. श्रीदेवी आपल्या कुटुंबियांसह लग्न सोहळ्यासाठी दुबईत गेल्या होत्या. शनिवारी रात्री 11-11.30 च्या सुमारास  कार्डिअॅक अरेस्टमुळे त्यांचं निधन झालं. यावेळी पती बोनी कपूर आणि धाकटी मुलगी खुशी त्यांच्यासोबत दुबईत होते, तर मोठी मुलगी जान्हवी मुंबईत होती.

श्रीदेवी यांना बॉलिवूडची पहिली लेडी सुपरस्टार मानलं जातं. श्री अम्मा यंगर अय्यपन म्हणजेच श्रीदेवी यांचा जन्म 13 ऑगस्ट 1963 रोजी झाला. त्यांनी हिंदी चित्रपटसृष्टीत पदार्पण करण्यापूर्वी तमिळ, तेलुगू, कन्नड, मल्ल्याळम चित्रपटातही अभिनय केला आहे. 

श्रीदेवी यांनी  मिथुन चक्रवर्तीशी केलेला पहिला विवाह अवघी तीन वर्षे टिकला. त्या दोघांनी 1988 साली घटस्फोट घेतला. त्यानंतर श्रीदेवी आणि चित्रपट निर्माते बोनी कपूर यांच्यात जवळीक निर्माण झाली. 1996 साली त्या दोघांनी लग्न केलं. हे बोनी यांचं दुसरं लग्न होतं.  1997 साली केलेल्या जुदाई चित्रपटानंतर श्रीदेवी यांनी जवळपास 15 वर्षांचा मोठा ब्रेक घेतला.

2012 मध्ये गौरी शिंदे दिग्दर्शित इंग्लिश विंग्लिश चित्रपटातून श्रीदेवींनी बॉलिवूडमध्ये पुनरागमन केलं. या चित्रपटातून त्यांनी पुन्हा एकदा प्रेक्षकांची मनं जिंकली. 2017 मध्ये प्रदर्शित झालेला ‘मॉम’ हा त्यांचा अखेरचा चित्रपट ठरला. श्रीदेवींच्या या अकाली एक्झिटमुळे संपूर्ण सिनेक्षेत्रात शोककळा पसरली आहे.