शरद पवारांना दणका
मुंबई, २१ जुलै २०२३, प्रतिनिधी : राष्ट्रवादी काँग्रेसमध्ये बंड करत भाजपसोबत सत्तेत सामील झालेल्या उपमुख्यमंत्री अजित पवारांनी पक्षाध्यक्ष शरद पवारांना पंधरा दिवसांतच दुसरा मोठा धक्का दिला आहे. नागालँडमधील राष्ट्रवादी काँग्रेसच्या सात आमदारांनी अजित पवारांच्या राष्ट्रवादीला पाठिंबा जाहीर केला आहे. इतकेच नाही तर नागालँडमधील आमदारांसह पक्षाच्या बहुसंख्य पदाधिकाऱ्यांनीही अजितदादांना पाठिंबा दिला आहे. नागालँडमधील आमदारांच्या या भूमिकेमुळे अजितदादांचे पारड जड झाले आहे.
नुकत्याच झालेल्या नागालँडमधील विधानसभेच्या निवडणुकीत राष्ट्रवादी काँग्रेस पक्षाचे सात आमदार निवडून आले होते. या आमदारांनी नागालँडमध्ये सत्तेत आलेल्या भाजपला पाठिंबा दिला आहे. आता याच आमदारांनी राष्ट्रवादीत फूट पडल्यानंतर अजित पवारांना आपला पाठिंबा जाहीर करत या संदर्भातील पत्र जारी केले आहे. त्यामुळे राष्ट्रवादी काँग्रेस पक्षात पुन्हा एकदा घडामोडींना वेग आला आहे.
राष्ट्रवादीत फूट पडल्यानंतर दोन गटाचे दोन वेगवेगळे मेळावे झाले होते. या मेळाव्यात दोन्ही गटांनी एकमेकांना लक्ष्य केले होते. तर राष्ट्रवादीमध्ये फूट पडल्यानंतर पंधरा दिवसांच्या आतच उपमुख्यमंत्री अजित पवार आणि त्यांच्या मंत्र्यांनी शरद पवारांची दोन वेळा भेट घेतली. तसेच राष्ट्रवादी काँग्रेस पार्टी एकसंघ ठेवण्यासाठी प्रयत्न करण्याची विनंतीही त्यांनी केली होती.
पण यावर शरद पवारांनी अद्यापही काहीही प्रतिक्रिया दिलेली नाही. असे असतानाच आता नागालँडमधील राष्ट्रवादी काँग्रेस पक्षाच्या सात आमदारांनी अजित पवारांना पाठिंबा जाहीर केला आहे. त्यामुळे यावर आता शरद पवार काय प्रतिक्रिया देतात, याकडे सर्वांचे लक्ष्य असणार आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.