बंडातात्या कराडकर यांची पोलीस स्थानकातून सुटका

बंडातात्या कराडकर यांची पोलीस स्थानकातून सुटका करण्यात आली आहे. बंडतात्या यांच्यावर गुन्हा दाखल झाल्यानंतर त्यांना चौकशीसाठी बोलवण्यात आले होते. दरम्यान, त्यांची जामिनावर सुटका झाली असल्याची माहिती त्यांचे वकील संग्राम मुंढेकर यांनी दिली आहे.

महिला नेत्यांबाबत आक्षेपार्ह विधान केल्याप्रकरणी बंडातात्या कराडकर यांच्यावर सातारा पोलिसांमध्ये तक्रार दाखल करण्यात आली होती. त्यानंतर सातारा शहर पोलिसांनी बंडातात्या यांच्यावर कलम १८८, २६९, ५०० आणि ५०९नुसार पोलिसांत गुन्हा दाखल करण्यात आला होता.

बंडातात्या कराडकर यांच्यावर गुन्हा दाखल झाल्यामुळे त्यांना चौकशीसाठी पोलिसांनी चौकशीसाठी बोलवले होते. यादरम्यान, त्यांची अडीच तास चौकशी झाल्यानंतर तात्पुरता त्यांची जामिनावर सुटका केली असल्याची माहिती वकील संग्राम मुंढेकर यांनी दिली आहे.

राज्य महिला आयोगाकडून गंभीर दखल

बंडातात्या कराडकर यांनी खासदार सुप्रियाताई सुळे व भाजप नेत्या पंकजा मुंडे यांच्याबद्दल वादग्रस्त वक्तव्य केले आहे, ते अंत्यत संतापजनक आहे. त्यांच्या या वक्तव्यामुळे महिलांच्या आत्मसन्माला व प्रतिष्ठेला धक्का पोहचला आहे. याची राज्य महिला आयोगाने गंभीर दखल घेतली आहे. तसेच सातारा पोलिसांनी या वक्तव्याबद्दल बंडातात्य कराडकर यांच्यावर कारवाई करावी. याचा अहवाल ४८ तासाच्या आत महिला आयोगास सादर करावा. तसेच बंडातात्या कराडकर यांनी सात दिवसाच्या आत आपला लेखी खुलासा आयोगास सादर करावा, असा आदेस राज्य महिला आयोगाच्या अध्यक्षा रुपाली चाकणकर यांनी दिले आहे.