LPG Gas Cylinder Price: हॉटेलमधील जेवण महागणार? व्यावसायिक सिलिंडरच्या किमतीत मोठी वाढ; तर घरगुती LPG च्या किमतीत…

LPG Gas Cylinder Price: आंतरराष्ट्रीय बाजारात कच्च्या तेलाच्या किमतींनी 105 डॉलर्स प्रति बॅरलचा टप्पा ओलांडला असताना, भारतीय ग्राहकांसाठी गॅस दरांबाबत संमिश्र वृत्त समोर आले आहे. सरकारी तेल विपणन कंपन्यांनी (OMCs) 14.2 किलोच्या घरगुती एलपीजी सिलिंडरचे दर स्थिर ठेवल्याने सर्वसामान्यांना मोठा दिलासा मिळाला आहे. मात्र, दुसरीकडे 19 किलोच्या व्यावसायिक गॅस सिलिंडरच्या वाढलेल्या किमतींनी हॉटेल व्यावसायिक आणि लहान दुकानदारांचे बजेट कोलमडले आहे.

घरगुती सिलिंडर: बजेटवर परिणाम नाही
वाढत्या महागाईच्या काळात घरगुती गॅसचे दर स्थिर राहणे ही गृहिणींसाठी समाधानाची बाब ठरली आहे. देशाची राजधानी दिल्लीमध्ये घरगुती सिलिंडरचा दर 913.00 रुपयांवर कायम आहे. मुंबईत हा दर 912.50 रुपये तर कोलकाता येथे 939.00 रुपये इतका आहे. दक्षिण भारतातील चेन्नई शहरात ग्राहकांना एका सिलिंडरसाठी 928.50 रुपये मोजावे लागत आहेत. स्थानिक टॅक्स आणि वाहतूक खर्चामुळे प्रत्येक शहरात हे दर थोडे वेगळे असू शकतात.

व्यावसायिक सिलिंडरचा फटका; खाद्यपदार्थ महागणार?
व्यावसायिक गॅस सिलिंडरच्या किमती गगनाला भिडल्या आहेत. दिल्लीत 19 किलोच्या व्यावसायिक सिलिंडरचा दर 3,071.50 रुपये, तर मुंबईत तो 3,024.00 रुपयांवर पोहोचला आहे. व्यावसायिक गॅसच्या या दरवाढीमुळे रेस्टॉरंट्स, ढाबा मालक आणि ऑनलाइन फूड डिलिव्हरी ॲप्स आपल्या खाद्यपदार्थांच्या किमती 5 टक्के ते 10 टक्क्यांनी वाढवण्याची शक्यता आहे. यामुळे सर्वसामान्यांच्या खिशाला हॉटेलिंग करताना कात्री लागणार आहे. 

हेही वाचा – Indian Mangoes In USA: भारताची 'मँगो डिप्लोमसी' जोरात! अमेरिकेत किती रुपये किलोने मिळतो भारतातील आंबा?

भविष्यातील संकेत
तेल कंपन्यांकडून दर महिन्याला दरांचा आढावा घेतला जातो. कच्च्या तेलाच्या जागतिक किमती स्थिर न राहिल्यास आगामी काळात घरगुती गॅसच्या दरांवरही दबाव वाढू शकतो. सध्या तरी सरकारने घरगुती ग्राहकांना वाढीव दरापासून वाचवले असले, तरी व्यावसायिक क्षेत्रातील दरवाढ अप्रत्यक्षपणे महागाई वाढवण्यास कारणीभूत ठरू शकते.