Flight Emergency: मोबाईलवर दिसलं ‘त्या’ नावाचं ब्लूटूथ नेटवर्क अन् हवेतच उडाली खळबळ; 190 प्रवाशांसह विमान फिरलं माघारी
स्पेनकडे जाणाऱ्या एका आंतरराष्ट्रीय विमानात अचानक भीतीचं वातावरण निर्माण झाल्याची घटना समोर आली आहे. मोबाईलवरील ब्लूटूथ नेटवर्कच्या नावामुळे संपूर्ण विमानात गोंधळ उडाला आणि सुरक्षा कारणास्तव विमानाला अर्ध्या प्रवासातून पुन्हा माघारी आणण्यात आले. या घटनेमुळे विमानातील प्रवासी काही काळ प्रचंड तणावाखाली होते.
मिळालेल्या माहितीनुसार, युनायटेड एअरलाईन्सचं यूए 236 हे विमान अमेरिकेतील न्यू जर्सी येथील नेवार्क लिबर्टी आंतरराष्ट्रीय विमानतळावरून स्पेनमधील पाल्मा डे मलोरका या शहराकडे रवाना झालं होतं. 30 मे रोजी सायंकाळी उड्डाण घेतलेल्या या विमानात सुमारे 190 प्रवासी आणि 12 कर्मचारी सदस्य उपस्थित होते.
उड्डाणानंतर काही वेळातच एका प्रवाशाने आपल्या मोबाईलवर उपलब्ध ब्लूटूथ नेटवर्क्स तपासत असताना त्याला ‘BOMB’ नावाचं नेटवर्क दिसलं. हे नाव पाहताच संबंधित प्रवासी घाबरला आणि त्याने तातडीने विमान कर्मचाऱ्यांना याची माहिती दिली. सुरक्षेच्या दृष्टीने हा प्रकार गंभीर मानण्यात आला.
विमानातील काही प्रवाशांनी सोशल मीडियावर या घटनेबाबत माहिती दिली आहे. एका प्रवाशाने सांगितलं की, कर्मचाऱ्यांनी तातडीने सर्व प्रवाशांना ब्लूटूथ डिव्हाइस बंद करण्याच्या सूचना दिल्या. मात्र संबंधित नेटवर्क काही काळ सक्रियच राहिल्याने संशय अधिक वाढला. यानंतर परिस्थिती वरिष्ठ अधिकाऱ्यांपर्यंत पोहोचवण्यात आली.
सुरक्षा धोक्याची शक्यता लक्षात घेऊन विमान पुन्हा न्यू जर्सीकडे वळवण्याचा निर्णय घेण्यात आला. विमान हवेत असतानाच ही प्रक्रिया सुरू करण्यात आली आणि काही वेळानंतर ते सुरक्षितपणे नेवार्क विमानतळावर उतरवण्यात आलं.
विमानतळावर लँडिंग झाल्यानंतर सर्व प्रवाशांना खाली उतरवण्यात आलं. त्यानंतर सुरक्षा यंत्रणांनी विमानाची सखोल तपासणी केली. केबिनपासून कार्गो विभागापर्यंत प्रत्येक भागाची पाहणी करण्यात आली. याशिवाय प्रवाशांच्या सामानाचीही तपासणी करण्यात आल्याचं सांगितलं जात आहे.
काही तासांच्या तपासणीनंतर विमानात कोणतीही संशयास्पद वस्तू आढळली नाही. त्यानंतर सुरक्षा यंत्रणांनी विमानाला पुन्हा उड्डाणासाठी परवानगी दिली. मात्र या संपूर्ण प्रकारामुळे प्रवाशांमध्ये काही काळ भीतीचं वातावरण निर्माण झालं होतं.
सोशल मीडियावर या घटनेची जोरदार चर्चा सुरू झाली आहे. काहींनी याला निष्काळजीपणा म्हटलं, तर काहींनी विमान सुरक्षेच्या दृष्टीने घेतलेला निर्णय योग्य असल्याचं सांगितलं. सध्या संबंधित ब्लूटूथ नेटवर्क कोणाच्या डिव्हाइसवरून दिसत होतं याबाबत अधिकृत माहिती समोर आलेली नाही.
अलीकडच्या काळात विमान सुरक्षेबाबत जगभरात अधिक सतर्कता बाळगली जात असल्याने अशा कोणत्याही संशयास्पद घटनेकडे गांभीर्याने पाहिलं जात आहे. त्यामुळे छोटासा संशय निर्माण झाला तरी तत्काळ कारवाई केली जात असल्याचं या घटनेतून पुन्हा स्पष्ट झालं आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.