Tukaram Munde on Celebrity: आता सेलिब्रिटीही तुकाराम मुंडेंच्या रडारवर, ‘ही’ एक चूक आणि होणार थेट कारवाई

ग्राहकांची दिशाभूल करणाऱ्या आणि खोटे दावे करणाऱ्या जाहिरातींवर आता अधिक कडक कारवाई करण्यात येणार असल्याचे स्पष्ट संकेत ग्राहक व्यवहार विभागाचे सचिव तुकाराम मुंढे यांनी दिले आहेत. फसव्या उत्पादनांच्या किंवा सेवांच्या जाहिरातींमध्ये सहभागी होणाऱ्या सेलिब्रिटी, इन्फ्लुएन्सर्स आणि जाहिरातदारांनाही जबाबदार धरले जाईल, असा इशारा त्यांनी दिला.

मुंढे यांनी सांगितले की, ग्राहकांची फसवणूक करणाऱ्या जाहिरातींमुळे अनेक नागरिक आर्थिक नुकसान सोसतात. काही कंपन्या उत्पादनांबाबत अतिरंजित किंवा दिशाभूल करणारे दावे करून ग्राहकांना आकर्षित करतात. अशा जाहिरातींमध्ये प्रसिद्ध व्यक्तींचा सहभाग असल्याने ग्राहकांचा विश्वास अधिक वाढतो. त्यामुळे अशा जाहिरातींची जबाबदारी केवळ कंपन्यांवरच नव्हे तर त्यांचा प्रचार करणाऱ्या व्यक्तींवरही निश्चित केली जाणार आहे.

ग्राहक संरक्षण कायद्यांतर्गत दिशाभूल करणाऱ्या जाहिरातींवर दंडात्मक कारवाईची तरतूद आहे. संबंधित उत्पादन किंवा सेवेबाबत पुरेशी पडताळणी न करता जाहिरात करणाऱ्या सेलिब्रिटींना नोटिसा बजावल्या जाऊ शकतात. गंभीर प्रकरणांमध्ये आर्थिक दंडासह जाहिरातींवरील बंदीची कारवाईही होऊ शकते. ग्राहकांच्या हिताचे संरक्षण करणे हे सरकारचे प्रमुख उद्दिष्ट असल्याचे मुंढे यांनी नमूद केले. डिजिटल माध्यमांच्या वाढत्या प्रभावामुळे सोशल मीडिया इन्फ्लुएन्सर्सकडून केल्या जाणाऱ्या जाहिरातींवरही विशेष लक्ष ठेवले जाणार आहे. नागरिकांनी कोणतेही उत्पादन खरेदी करण्यापूर्वी त्याची माहिती तपासून पाहावी आणि संशयास्पद जाहिरातींबाबत संबंधित यंत्रणांकडे तक्रार करावी, असे आवाहनही त्यांनी केले.

फसव्या जाहिरातींवर नियंत्रण आणण्यासाठी आणि ग्राहकांच्या हक्कांचे संरक्षण करण्यासाठी सरकारकडून अधिक कठोर पावले उचलली जात असल्याने ग्राहकांमध्ये समाधान व्यक्त केले जात आहे. तज्ज्ञांच्या मते, या निर्णयामुळे जाहिरात क्षेत्रात अधिक पारदर्शकता येईल आणि ग्राहकांची दिशाभूल होण्याचे प्रमाण कमी होईल.