Delhi Blast Update : मोठा खुलासा! देशातील ‘ही’ शहरेही होती हिटलिस्टवर; स्लीपर मॉड्यूल करण्यात आले होते सक्रिय
Delhi Blast Update: दिल्लीच्या लाल किल्ल्याजवळ 10 नोव्हेंबर रोजी घडलेला कार स्फोटामुळे देशभरात खळबळ उडाली आहे. या स्फोटात 12 जणांचा मृत्यू झाला असून 20 हून अधिक जण जखमी झाले आहेत. स्फोटामुळे अनेक वाहनांचे नुकसान झाले आहे. सुरक्षा सूत्रांच्या माहितीनुसार, अटक केलेल्या आरोपींच्या चौकशीतून महत्त्वाची माहिती समोर आली आहे. या आरोपींचे मॉड्यूल फक्त दिल्लीपुरते मर्यादित नव्हते, तर उत्तर प्रदेशातील धार्मिक स्थळे आणि मंदिरे, विशेषतः अयोध्या आणि वाराणसीला लक्ष्य करण्यासाठी तयार करण्यात आले होते.
अयोध्येत स्फोट घडवण्याचा आरोपींचा मानस असल्याचे स्पष्ट झाले आहे. अटक केलेल्या शाहीनने अयोध्येत स्लीपर मॉड्यूल सक्रिय केले होते, परंतु पोलिसांच्या छापेमारीत स्फोटके जप्त करण्यात आली, ज्यामुळे मोठा अपघात टाळला गेला, असं सांगितलं. स्फोटाच्या तपासात असेही दिसून आले आहे की, लाल किल्ल्यावर घडलेल्या स्फोटासाठी कोणतीही टायमर किंवा इतर अत्याधुनिक उपकरणांचा वापर केला गेला नव्हता. यावरून असे स्पष्ट होते की स्फोट घाईघाईत करण्यात आला होता. चौकशीतून असेही समोर आले की, या मॉड्यूलचा उद्देश रुग्णालये आणि गर्दीची ठिकाणे लक्ष्य करून जास्तीत जास्त नुकसान करण्याचा होता.
या प्रकरणातील तीन मुख्य संशयितांमध्ये डॉ. मुझम्मिल, डॉ. आदिल अहमद दार आणि डॉ. उमर यांचा समावेश आहे. स्फोटाच्या वेळी डॉ. उमर यांचा मृत्यू झाल्याचा संशय आहे, तर डॉ. मुझम्मिल आणि डॉ. आदिल अहमद दार यांना अटक करण्यात आले आहे. सध्या सुरक्षा दल घटना स्थळी आणि संबंधित ठिकाणी तणाव कमी करण्यासाठी आणि पुढील कटांना रोखण्यासाठी सतत कारवाई करत आहेत.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.