Useless Covid PPE : कोविड महामारीसाठी खरेदी केलेले दोन तृतीयांश PPE वापरण्यायोग्य नसल्याचा धक्कादायक खुलासा; कोविड चौकशी अहवालातून स्पष्ट
महामारीच्या काळात पुरेशा वैयक्तिक संरक्षक उपकरणांचा (PPE) अभाव असल्याने NHS कर्मचारी आणि रुग्ण यांचे प्राण धोक्यात आले असल्याचा निष्कर्ष कोविड चौकशी अहवालात नमूद करण्यात आला आहे. या चौकशीत असे आढळून आले की, PPE साठी करदात्यांच्या पैशांचा "मोठा हिस्सा" वाया गेला. यूके आणि संबंधित प्रादेशिक सरकारांनी खर्च केलेल्या 14.9 अब्ज पाउंडपैकी जवळपास 10 अब्ज पाउंड इतकी ही रक्कम होती. चौकशी समितीच्या अध्यक्षा बॅरोनेस हॅलेट यांनी सांगितले की, महामारीच्या सुरुवातीला देशाकडे असलेले मास्क, गाउन आणि हातमोजे यांचा साठा अत्यंत धोकादायक स्थितीत होता. तर नवीन साठा मिळवण्यासाठीच्या जागतिक स्पर्धेत उतरण्याची देशाची कोणतीही तयारी नव्हती. त्यांनी वादग्रस्त व्हीआयपी लेन (VIP lane) धोरणावर टीका केली. या धोरणांतर्गत राजकीय संबंध असलेल्या व्यक्तींकडून आलेल्या PPE पुरवठ्याच्या प्रस्तावांना प्राधान्य दिले जात होते. त्यांनी याला चुकीचे धोरण म्हटले. ज्यामुळे लोकांचा विश्वास डळमळीत झाला.
मात्र, त्यांनी असेही स्पष्ट केले की अंतिम कंत्राटे देताना मंत्री किंवा इतर अधिकाऱ्यांकडून आपल्या मर्जीतील लोकांना लाभ पोहोचवल्याचा (cronyism) किंवा भ्रष्टाचाराचा कोणताही पुरावा आढळला नाही. चौकशीत असेही दिसून आले की, जेव्हा होम टेस्टिंग किट्स आणि व्हेंटिलेटरसारख्या इतर उपकरणांचा खर्च यात समाविष्ट केला गेला. तेव्हा जानेवारी 2020 ते जून 2022 या काळात सरकारने केलेला एकूण खर्च 42 अब्ज पाउंडपेक्षा जास्त झाला होता.
रुग्णालयांकडून वाढत्या मागणीमुळे, मार्च 2020 च्या अखेरीस युकेचा पीपीई (PPE) साठा संपत आला होता. हा आपत्कालीन साठा पुन्हा भरण्यापूर्वी किमान 15 आठवडे पुरेल अशा प्रकारे नियोजित करण्यात आला होता. चौकशीत असे आढळून आले की, इंग्लंडच्या महामारी-विषयक साठ्यातील केवळ एक-तृतीयांश मास्कच वापरण्यायोग्य होते. तर स्कॉटलंडकडे रुग्णालयांमध्ये वापरल्या जाणाऱ्या उच्च-दर्जाच्या रेस्पिरेटरी मास्कचा (श्वसन-संरक्षक मास्कचा) कोणताही साठा उपलब्ध नव्हता. एकूण, यूके सरकारला न वापरलेले किंवा कालबाह्य झालेले 9.9 अब्ज किमतीचे पीपीई (PPE) आणि न वापरलेल्या आरोग्यसेवा उपकरणांसाठी 157 दशलक्ष खर्च करण्यास भाग पडले.
'व्हेंटिलेटर चॅलेंज' कार्यक्रमांतर्गत, पुरवठादारांना कमी वेळेत श्वसन उपकरणे विकसित करण्यास सांगितले होते, ज्यामुळे अशा डिझाइन्ससाठी आणखी 143 दशलक्ष खर्च आला, जे कधीच उत्पादनात आले नाहीत. स्कॉटलंडमध्ये, पीपीई आणि चाचणी किट्ससह अंदाजे 8 दशलक्ष किमतीची आरोग्यसेवा उपकरणे रद्द करण्यात आली. वेल्समध्ये न वापरलेल्या पीपीईवर 18 दशलक्ष खर्च झाला आणि उत्तर आयर्लंडमध्ये 43 दशलक्ष किमतीचे मास्क, गाऊन आणि ग्लोव्हज वापरण्यापूर्वीच कालबाह्य होण्याच्या धोक्यात होते.
चौकशी अहवालात म्हटले आहे की, साथीच्या काळात कमी पीपीई खरेदी करण्यापेक्षा जास्त खरेदी करणे चांगले असले तरी, "पुरवठा मागणीनुसार अधिक अचूकपणे जुळवून घेतला असता तर ते अधिक चांगले झाले असते". "उत्तम नियोजनामुळे खरेदीचे निर्णय अधिक न्याय्य, जलद आणि कमी खर्चाचे झाले असते," असा निष्कर्ष अहवालात काढण्यात आला. सरकारी आपत्कालीन योजनांची "कधीही कसून चाचणी घेण्यात आली नव्हती" आणि अधिकारी व मंत्र्यांना "काही दिवसांतच नवीन आपत्कालीन खरेदी आणि वितरण प्रणाली स्थापित करून, ऐनवेळी उपाययोजना करण्यास भाग पडले".
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.