Stock Market Today: ‘आता काय करायचे?’; शेअर बाजार आजही कोसळला, तरीही ‘या’ शेअर्समध्ये आहे कमाईची संधी?
मुंबई: भारतीय शेअर बाजारात आज गुरुवारी, 19 मार्च 2026 रोजी मोठी घसरण पाहायला मिळाली. बाजार उघडताच बीएसई सेन्सेक्समध्ये तब्बल 1953 अंकांची घसरण झाली आणि निर्देशांक 74751 या पातळीवर उघडला. त्याचवेळी एनएसई निफ्टीतही मोठी पडझड झाली असून तो सुमारे 525 अंकांनी घसरून व्यवहार करताना दिसत आहे. जागतिक घडामोडी आणि कच्च्या तेलाच्या वाढलेल्या किमतींमुळे गुंतवणूकदारांमध्ये चिंता वाढल्याचे चित्र दिसत आहे.
गुरुवारी आशियाई शेअर बाजारांमध्येही मोठी घसरण नोंदवली गेली. अमेरिकन बाजारातील घसरणीचा परिणाम आशियाई बाजारांवर स्पष्टपणे दिसून आला. जपानचा निक्केई निर्देशांक सुमारे 2.5 टक्क्यांनी खाली आला, तर टॉपिक्स निर्देशांकातही जवळपास 1.8 टक्क्यांची घसरण झाली. दक्षिण कोरियाचा कोस्पी निर्देशांक सुमारे 2.6 टक्क्यांनी घसरला असून कोस्डॅकमध्येही सुमारे 1.7 टक्क्यांची घसरण झाली. ऑस्ट्रेलियाचा एस अँड पी/एएसएक्स 200 निर्देशांकही सुमारे 1.5 टक्क्यांनी खाली येत कमकुवत सुरुवात करताना दिसला.
काल बुधवारी, 18 मार्च 2026 रोजी अमेरिकन शेअर बाजारातही मोठी घसरण झाली होती. व्यवहाराच्या शेवटी सर्व प्रमुख निर्देशांक खालच्या पातळीवर बंद झाले. डाऊ जोन्स इंडस्ट्रियल ॲव्हरेज 768.11 अंकांनी म्हणजेच 1.63 टक्क्यांनी घसरून 46225.15 या पातळीवर बंद झाला. एस अँड पी 500 निर्देशांकात 1.36 टक्क्यांची घसरण होऊन तो 6624.70 वर बंद झाला. तर नॅस्डॅक कंपोझिट निर्देशांक 1.46 टक्क्यांनी घसरून 22152.42 या पातळीवर स्थिरावला.
अमेरिकन बाजारातील घसरणीमागे दोन महत्त्वाची कारणे सांगितली जात आहेत. पहिले कारण म्हणजे अमेरिकेच्या फेडरल रिझर्व्हने व्याजदर 3.50 ते 3.75 टक्क्यांच्या दरम्यान कायम ठेवण्याचा निर्णय घेतला. दुसरे महत्त्वाचे कारण म्हणजे इराणमधील युद्धस्थितीमुळे कच्च्या तेलाच्या किमतींमध्ये मोठी वाढ झाली आहे. तेलाच्या वाढत्या किमतींमुळे जागतिक स्तरावर महागाई वाढण्याची भीती निर्माण झाली आहे.
पश्चिम आशियातील वाढत्या तणावाचा परिणाम कच्च्या तेलाच्या बाजारावरही दिसून येत आहे. कच्च्या तेलाच्या किमतींमध्ये सुमारे चार टक्क्यांची वाढ झाली आहे. अमेरिकेचे डब्ल्यूटीआय कच्चे तेल सुमारे 3.1 टक्क्यांनी वाढून 99.31 डॉलर प्रति बॅरलच्या आसपास पोहोचले आहे. तर ब्रेंट कच्चे तेल सुमारे 4.1 टक्क्यांनी वाढून 111.59 डॉलर प्रति बॅरलच्या पातळीवर पोहोचले आहे.
जागतिक बाजारातील या अस्थिरतेचा थेट परिणाम भारतीय शेअर बाजारावर दिसत असून गुंतवणूकदारांमध्ये सावधगिरीचे वातावरण निर्माण झाले आहे. तज्ज्ञांच्या मते, पश्चिम आशियातील तणाव आणि तेलाच्या वाढत्या किमती कायम राहिल्यास पुढील काही दिवस बाजारात अस्थिरता सुरू राहण्याची शक्यता आहे.
Disclaimer : शेअर बाजारातील गुंतवणूक जोखमीची आहे. नियम व अटी काळजीपूर्वक वाचा. जय महाराष्ट्र न्यूज कोणत्याही नफ्या-तोट्यास जबाबदार नाही. गुंतवणुकीपूर्वी तज्ज्ञांचा सल्ला घ्या!
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.