Jaishankar Slams Pakistan: पाकिस्तान हे दहशतवादाचं माहेरघर; जयशंकर यांचा पाकिस्तानवर अप्रत्यक्ष हल्लाबोल

परराष्ट्र मंत्री एस. जयशंकर यांनी संयुक्त राष्ट्र महासभेत (UNGA) शनिवारी केलेल्या भाषणात दहशतवादाच्या मुद्द्यावर पाकिस्तानला थेट नाव न घेता लक्ष्य केले. “गेल्या अनेक दशकांपासून आंतरराष्ट्रीय स्तरावरील बहुतेक दहशतवादी कारवाया एका विशिष्ट देशाशी जोडलेल्या आहेत,” असे ठाम विधान करत त्यांनी जागतिक सहकार्य अधिक मजबूत करण्याचं आवाहन केलं.

जयशंकर म्हणाले की, भारताने स्वातंत्र्यानंतरपासून दहशतवादाचा सामना केला आहे. “आमचा शेजारी अनेक वर्षे जागतिक दहशतवादाचा केंद्रबिंदू राहिला आहे. दहशतवाद मोठ्या प्रमाणावर द्वेष, हिंसा आणि भीती पसरवतो. त्यामुळे त्याविरोधात कठोर कारवाई आवश्यक आहे,” असे ते म्हणाले.

एप्रिलमध्ये पहलगाम येथे झालेल्या दहशतवादी हल्ल्याचा उल्लेख करत त्यांनी सांगितलं की, “भारताने आपल्या नागरिकांचे संरक्षण करण्यासाठी आवश्यक पावले उचलली आणि जबाबदारांना न्यायालयापर्यंत आणलं.” त्यांनी यासोबतच दहशतवादी वित्तपुरवठा रोखण्यावर भर देण्याचं आवाहन केलं. “जेव्हा दहशतवाद्यांचा गौरव होतो आणि दहशतवादी केंद्रं औद्योगिक स्तरावर चालतात, तेव्हा आंतरराष्ट्रीय समुदायाने त्याचा ठाम निषेध करायला हवा. अन्यथा त्याचे दुष्परिणाम सर्वांनाच भोगावे लागतील,” असा इशारा त्यांनी दिला.

भाषणात जयशंकर यांनी आत्मनिर्भरता, आत्मरक्षा आणि आत्मविश्वास या भारताच्या तीन स्तंभांचा उल्लेख केला. तसेच, युक्रेन आणि गाझा संघर्षासंदर्भात भारत शांततेचं समर्थन करत असल्याचं त्यांनी स्पष्ट केलं. “संघर्ष थांबवून संवादातून उपाय शोधणं हीच खरी गरज आहे,” असं त्यांनी सांगितलं.

संयुक्त राष्ट्राच्या कार्यक्षमतेवर प्रश्न उपस्थित करत जयशंकर म्हणाले, “ही संस्था केवळ युद्ध टाळण्यासाठी नाही, तर कायमस्वरूपी शांतता आणि मानवतेचा सन्मान राखण्यासाठी आहे. पुढील दशक नेतृत्व आणि जबाबदारीचं ठरलं पाहिजे.”