ISIS Terrorism: आईला पोटच्या मुलाला बनवायचं होतं दहशतवादी? ‘इस्लामचा खरा मार्ग’ असं सांगत दाखवले हिंसेचे व्हिडिओ
ISIS Terrorism: केरळमधून समोर आलेल्या एका धक्कादायक प्रकरणाने संपूर्ण देश हादरला आहे. एखाद्या आईचं प्रेम कसं असतं. आपल्या मुलाच्या सुरक्षेसाठी जीव तोडून लढणारं… पण इथे चित्र पूर्ण उलट आहे. आपल्या 15 वर्षीय मुलाच्या भविष्यातील वाटचाल सुरक्षित करण्याऐवजी, एका आईने त्याला थेट दहशतवादाच्या मार्गावर ढकलल्याचं पोलिसांच्या तपासात समोर आलं आहे. या प्रकरणाकडे देशभरातून चिंतेच्या नजरेने पाहिले जात असून तपास यंत्रणाही उच्चस्तरीय चौकशीला सुरुवात केली आहे.
काय आहे संपूर्ण प्रकरण?
केरळ पोलिसांनी दाखल केलेल्या एफआयआरनुसार, अल्पवयीन मुलाला कट्टरपंथी बनवण्यासाठी त्याच्या आईने UK मध्ये असलेल्या एका ISIS समर्थकासोबत हातमिळवणी केली. या प्रकरणात “अंजार” नावाचा व्यक्ती मुख्य सूत्रधार मानला जात असून तो सध्या ब्रिटनमधील लीसेस्टर येथे राहत आहे. त्याने मुलाशी ऑनलाइन संपर्क साधून त्याला ISIS च्या प्रचारसाहित्याचे व्हिडिओ, हिंसेची चित्रफीत आणि धार्मिक द्वेष वाढवणारी सामग्री दाखवल्याचा आरोप आहे.
पोलिसांच्या प्राथमिक तपासात असे लक्षात आले की, मुलावर मानसिकदृष्ट्या प्रभाव टाकून त्याच्यात इतर धर्मांविषयी तीव्र द्वेष निर्माण करण्यात आला. ISIS च्या दहशतवादी विचारधारेला “खरा मार्ग” असल्याचे सांगत त्याच्या मनात चुकीचे धार्मिक समज रुजवण्याचा प्रयत्न करण्यात आला.
हेही वाचा: Delhi Blast Update: दिल्ली स्फोट प्रकरणात इरफान मुख्य सूत्रधार; ब्रेनवॉश करायचा आणि…
आईची भूमिका धक्कादायक
या प्रकरणातील सर्वात विचलित करणारा भाग म्हणजे मुलाची आई फिदा मोहम्मद अली हिने केलेली भूमिका. एफआयआरनुसार, तिने केवळ या सगळ्याला मान्यता दिली नाही, तर स्वतःही अंजारसोबत मिळून मुलावर प्रभाव टाकण्यासाठी सक्रिय सहभाग घेतला. मुलाच्या मोबाईल आणि लॅपटॉपवरून मिळालेल्या पुराव्यांमध्ये हे स्पष्ट संकेत मिळाले की आई आणि ISIS समर्थक अंजार यांनी मिळून मुलाला कट्टरकरणाच्या दिशेने ढकलले.
तपासकर्त्यांच्या मते, मुलाला सतत हिंसक धार्मिक व्हिडिओ आणि दहशतवादी सामग्री पाहण्यास भाग पाडले जात होते. त्याला शांतपणे शिक्षण आणि करिअरकडे लक्ष देण्याऐवजी “धार्मिक युद्ध” हीच खरी वाट असल्याचा भ्रम पसरवण्यात आला.
एनआयए करणार सखोल तपास
या प्रकरणात अधिक मोठ्या कटाची शक्यता गृहीत धरून केरळ पोलिसांनी एनआयएला माहिती दिली आहे. प्राथमिक तपासात काही “गुप्त घटक” (secret elements) राज्यात सक्रिय असल्याचे संकेत मिळाल्याने, आता या प्रकरणाचा ताबा एनआयए घेण्याची तयारी करत आहे. तपास राष्ट्रीय पातळीवर नेल्यानंतर नवीन एफआयआर नोंदवली जाणार असून आंतरराष्ट्रीय लिंकची सखोल चौकशी केली जाईल.
या सगळ्या प्रकरणामुळे देशात पुन्हा एकदा कट्टरपंथीकरणाच्या धोक्यावर गंभीर चर्चा सुरू झाली आहे. विशेषतः सोशल मीडिया आणि ऑनलाइन प्लॅटफॉर्मद्वारे अल्पवयीन मुलांना कसे लक्ष्य केले जाते, याविषयी चिंता वाढली आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.