JEE Main Exam Result 2026 चा आज निकाल जाहीर होणार?; 11 लाख विद्यार्थ्यांचे भवितव्य ठरणार, Result कसा पाहायचा?

नवी दिल्ली: राष्ट्रीय चाचणी संस्था (National Testing Agency, NTA) आज म्हणजेच 20 एप्रिल 2026 रोजी JEE Main 2026 Session 2 चा निकाल जाहीर करू शकते. निकाल JEE Main Session 2 च्या अधिकृत संकेतस्थळावर प्रसिद्ध केला जाणार आहे. परीक्षा देशभरात 2 एप्रिल ते 8 एप्रिल 2026 दरम्यान घेण्यात आली होती. ही परीक्षा 304 शहरांतील 566 परीक्षा केंद्रांवर आयोजित करण्यात आली होती.

निकाल जाहीर होण्यापूर्वी आज अंतिम उत्तरतालिकाही प्रसिद्ध केली जाणार आहे. उमेदवारांना त्यांची उत्तरपत्रिका आणि अंतिम उत्तरतालिका तपासल्यानंतर अधिकृत निकाल पाहता येणार आहे. निकाल पाहण्यासाठी उमेदवारांना अर्ज क्रमांक आणि जन्मतारीख वापरून लॉगिन करावे लागेल.

जे उमेदवार JEE Main मध्ये पात्र ठरतील, त्यांना पुढील JEE Advanced 2026 परीक्षेला बसण्याची संधी मिळेल. ही परीक्षा 17 मे 2026 रोजी होणार आहे. JEE Advanced मध्ये मिळालेल्या क्रमांकानुसारच पुढे भारतीय तंत्रज्ञान संस्था म्हणजेच IIT सारख्या प्रमुख संस्थांमध्ये प्रवेश मिळतो.

हेही वाचा: Suntera Pawar: बारामतीत प्रचाराचा धुराळा! उपमुख्यमंत्री सुनेत्रा पवारांकडून धनगर समाजाचे जाहीर आभार; नक्की का मानले आभार?

यावर्षी एप्रिल सत्राच्या परीक्षेसाठी 11 लाखांहून अधिक विद्यार्थ्यांनी अर्ज केला होता. त्यामुळे निकालाची उत्सुकता मोठ्या प्रमाणावर आहे. साधारणपणे JEE Main मधील सर्वोच्च अडीच लाख उमेदवारांना JEE Advanced परीक्षेसाठी पात्रता मिळते.

गेल्या पाच वर्षांच्या आकडेवारीनुसार, जनरल प्रवर्गासाठी कट-ऑफ 90 ते 100 पर्सेंटाइलच्या दरम्यान राहिले आहे. तर OBC, SC आणि ST प्रवर्गांसाठी कट-ऑफ वेगवेगळ्या पातळीवर राहिले आहे. त्यामुळे विद्यार्थ्यांना यंदाच्या संभाव्य कट-ऑफचा अंदाज येऊ शकतो. मात्र अंतिम चित्र निकाल जाहीर झाल्यानंतरच स्पष्ट होणार आहे. 

हेही वाचा: Petrol Diesel Rate Today: भारतावर इंधन दरवाढीचं संकट? पाहा मुंबई-पुण्यासह प्रमुख शहरांतील आजचे पेट्रोल-डिझेलचे दर