US, Israel-Iran War : ‘होर्मुज’मधून जहाज न्यायचे असेल तर आमच्या नौदलाची परवानगी घ्या! इराणचा नवा हुकूम

US, Israel-Iran War :  इराण आणि अमेरिका-इस्रायल यांच्यात सुरू असलेल्या युद्धामुळे मध्यपूर्वेतील तणाव आता टोकाला पोहोचला आहे. इराणने जागतिक व्यापारासाठी अत्यंत महत्त्वाच्या असलेल्या 'स्ट्रेट ऑफ होर्मुज'वर (Strait of Hormuz) आपले नियंत्रण अधिक कडक केले असून, येथून जाणाऱ्या प्रत्येक जहाजाला आता इराणी नौदलाची परवानगी घेणे अनिवार्य केले आहे. दरम्यान, इराणच्या शेजारी असलेल्या संयुक्त अरब अमिरातीने (UAE) या युद्धाबाबत आपली भूमिका स्पष्ट करत अमेरिकेला मोठा संदेश दिला आहे.

इराणचे 'नौदल समन्वय' धोरण
इराणच्या परराष्ट्र मंत्रालयाने स्पष्ट केले आहे की, 'स्ट्रेट ऑफ होर्मुज'ची सुरक्षा ही इराणच्या राष्ट्रीय सुरक्षेशी जोडलेली आहे. त्यामुळे या जलमार्गातून प्रवास करणाऱ्या सर्व जहाजांना इराणी नौदलाशी (Iranian Navy) समन्वय साधावा लागेल. इराणचे नवीन सर्वोच्च नेते मुजतबा खामेनी यांनी या जलमार्गाचा वापर अमेरिका आणि इस्रायलवर दबाव टाकण्यासाठी 'लिव्हर' म्हणून केला जाईल, असे संकेत दिले आहेत. ज्या जहाजांनी इराणच्या इशाऱ्याकडे दुर्लक्ष केले, त्यांच्यावर ड्रोन आणि क्षेपणास्त्रांद्वारे हल्ले करण्यात आले आहेत. 28 फेब्रुवारी 2026 पासून सुरू झालेल्या या युद्धानंतर होर्मुजमधील वाहतूक 90 टक्क्यांनी घटली असून दिवसाला केवळ 10 पेक्षा कमी जहाजे येथून जात आहेत.

युएईची अमेरिकेला चपराक: "आमची जमीन युद्धासाठी नाही"
इराणकडून आखाती देशांवर होणाऱ्या हल्ल्यांच्या पार्श्वभूमीवर संयुक्त अरब अमिरातीच्या राज्यमंत्री लाना नुसेबेह यांनी अत्यंत महत्त्वाची भूमिका मांडली आहे. त्यांनी स्पष्ट केले की, 'युएई आपली भूमी किंवा हवाई हद्द अमेरिकेला इराणवर हल्ले करण्यासाठी वापरू देणार नाही.' इराणने आखाती देशांवर केलेले हल्ले बेकायदेशीर असल्याचे सांगतानाच, लाना नुसेबेह यांनी पुढे जाण्याचा मार्ग केवळ 'कूटनीती' (Diplomacy) हाच असल्याचे प्रतिपादन केले. अमेरिकेचे राष्ट्राध्यक्ष डोनाल्ड ट्रम्प या युद्धावर राजनैतिक तोडगा काढतील, असा विश्वासही त्यांनी व्यक्त केला.

हेही वाचा – Israel-US Iran War: बगदादमध्ये अमेरिकन दूतावासावर हल्ला; इराणचा बदला घेण्याचा इशारा, युद्धाचा वणवा आणखीन पेटणार?

युएईचे झालेले नुकसान आणि लष्करी सज्जता
युद्ध सुरू झाल्यापासून इराणने युएईसह सौदी अरेबिया, कतार, कुवैत आणि ओमानमधील अनेक ठिकाणांना लक्ष्य केले आहे. लाना नुसेबेह यांनी माहिती दिली की, आतापर्यंत युएईने आपल्या हवाई हद्दीत इराणचे सुमारे 1800 ड्रोन्स आणि क्षेपणास्त्रे नष्ट केली आहेत. दुबई आंतरराष्ट्रीय विमानतळावर झालेल्या ड्रोन हल्ल्यामुळे शेकडो विमाने रद्द करावी लागली होती, तर काही प्रसिद्ध हॉटेल्सचेही मोठे नुकसान झाले आहे. तरीही, युएईची अर्थव्यवस्था मजबूत असून ती अशा संकटांना तोंड देण्यास सक्षम असल्याचे त्यांनी ठामपणे सांगितले.

आखाती देशांतील अमेरिकन तळांवर टांगती तलवार
इराणने शेजारील देशांना इशारा दिला आहे की, जर त्यांच्या भूमीवर असलेल्या अमेरिकन लष्करी तळांवरून इराणवर हल्ले झाले, तर त्या देशांनाही परिणामांना सामोरे जावे लागेल. याच भीतीपोटी आणि आपली तटस्थता टिकवण्यासाठी युएईने अमेरिकेला लष्करी वापरासाठी नकार दिला आहे. इराणने कतार, बहरीन आणि सौदी अरेबियातील अमेरिकन तळांच्या जवळही हल्ले केले आहेत. सध्याची परिस्थिती पाहता, आखाती देश या दोन महाशक्तींच्या संघर्षात भरडले जात असून प्रत्येकाचे लक्ष आता शांतता प्रस्थापित करण्याकडे लागले आहे.

हेही वाचा – North Korea Attack : आखाती युद्ध सुरू असतानाच उत्तर कोरियाचाही क्षेपणास्र हल्ला, दक्षिण कोरिया-जपान सतर्क