Inflation News: मोठी बातमी! ऑगस्टपासून बसणार महागाईचा आणखी फटका; चहा, कपड्यांसह ‘या’ वस्तू महागण्याची शक्यता

पश्चिम आशियातील वाढत्या संघर्षाचे पडसाद आता भारतीय बाजारपेठेत उमटू लागले आहेत. उत्पादन खर्च, कच्च्या मालाच्या किमती आणि वाहतूक खर्चात झालेल्या वाढीमुळे अनेक कंपन्या ऑगस्टपासून उत्पादनांच्या किमती वाढवण्याच्या तयारीत आहेत. त्यामुळे वाहनांपासून इलेक्ट्रॉनिक वस्तू आणि दैनंदिन वापराच्या अनेक वस्तूंसाठी ग्राहकांना अधिक पैसे मोजावे लागू शकतात. 

कोणत्या वस्तू महाग होणार?

उद्योग क्षेत्रातील माहितीनुसार, ऑगस्टपासून पॅकेज्ड चहा, हेअर ऑइल, रेफ्रिजरेटर, टीव्ही, वॉशिंग मशीन, रेडीमेड कपडे आणि प्रवासी वाहनांच्या किमती वाढण्याची शक्यता आहे. काही उत्पादनांच्या दरात 4 ते 8 टक्क्यांपर्यंत वाढ होऊ शकते, असे उद्योग क्षेत्रातील अधिकाऱ्यांचे म्हणणे आहे. 

दरवाढीमागील प्रमुख कारणे

पश्चिम आशियातील संघर्षामुळे जागतिक पुरवठा साखळीवर परिणाम झाला आहे. यामुळे समुद्री मालवाहतूक खर्च वाढला असून कच्चे तेल, प्लास्टिक, पॅकेजिंग साहित्य आणि इतर कच्च्या मालाच्या किमतींमध्ये वाढ झाली आहे. त्याचबरोबर रुपयाच्या विनिमय दरातील चढ-उतारामुळे आयातीचा खर्चही वाढला आहे. परिणामी कंपन्यांच्या उत्पादन खर्चात वाढ झाली असून त्याचा परिणाम आता ग्राहकांवर होणार आहे. 

 इलेक्ट्रॉनिक वस्तूंवरही परिणाम

ग्राहक इलेक्ट्रॉनिक्स क्षेत्रातील कंपन्यांनी ऑगस्टपासून टीव्ही, रेफ्रिजरेटर आणि वॉशिंग मशीनच्या किमती वाढवण्याचे संकेत दिले आहेत. यंदा मेमरी चिप्सच्या वाढलेल्या किमती आणि पुरवठ्यातील अडचणींमुळे टीव्हीच्या किमती आधीच वाढल्या असून, आता आणखी दरवाढ होण्याची शक्यता व्यक्त केली जात आहे. स्मार्टफोनच्या उत्पादन खर्चावरही याचा परिणाम होत असल्याचे सांगितले जात आहे. 

वाहन खरेदी महागणार

वाहन उद्योगातही दरवाढीची तयारी सुरू झाली आहे. वाढत्या उत्पादन खर्चामुळे काही प्रमुख वाहन उत्पादकांनी ऑगस्टपासून कारच्या किमती वाढवण्याचा निर्णय घेतला आहे. काही कंपन्या उत्पादन खर्च आणि आयात खर्चाचा आढावा घेत असून, लवकरच नव्या किमती जाहीर केल्या जाण्याची शक्यता आहे. 

कपडे आणि FMCG उत्पादनांनाही फटका

आतापर्यंत जुन्या साठ्यामुळे कपड्यांच्या किमती स्थिर होत्या. मात्र, नव्या हंगामातील महागड्या कच्च्या मालापासून तयार झालेला साठा बाजारात येत असल्याने कपड्यांच्या किमती वाढण्याची शक्यता आहे. तसेच चहा, हेअर ऑइल आणि इतर दैनंदिन वापराच्या वस्तूंच्या उत्पादन खर्चात वाढ झाल्यामुळे FMCG कंपन्याही दरवाढ करण्याच्या तयारीत आहेत.

सणासुदीपूर्वी ग्राहकांवर अतिरिक्त भार

ऑगस्टपासून ओणमसह सणासुदीच्या खरेदीला सुरुवात होत असल्याने कंपन्या त्यापूर्वीच नवीन दर लागू करण्याचा विचार करत आहेत. यामुळे आगामी काही महिन्यांत घरगुती वस्तू, इलेक्ट्रॉनिक्स, वाहन आणि कपड्यांच्या खरेदीसाठी ग्राहकांना अधिक खर्च करावा लागू शकतो. कंपन्यांना ही दरवाढ सणासुदीपूर्वीची शेवटची वाढ ठरेल, अशी अपेक्षा आहे.