India-Afghanistan Relations: भारत-अफगाणिस्तानमध्ये पारंपरिक औषध प्रणालीतील सहकार्य मजबूत करण्यावर चर्चा

India-Afghanistan Relations: भारत आणि अफगाणिस्तान यांच्यात पारंपरिक औषध प्रणालीतील सहकार्य अधिक दृढ करण्यावर महत्त्वपूर्ण चर्चा झाली. अफगाणिस्तानचे सार्वजनिक आरोग्य मंत्री मौलवी नूर जलाल जलाली यांनी केंद्रीय आयुष राज्यमंत्री प्रतापराव जाधव यांची भेट घेत शिक्षण, संशोधन, नियमन आणि आरोग्य सेवा वितरण या क्षेत्रांमध्ये परस्पर सहकार्य वाढवण्याच्या शक्यतांवर सविस्तर चर्चा केली. आयुष मंत्रालयाने गुरुवारी ‘एक्स’ (पूर्वीचे ट्विटर) वर केलेल्या पोस्टमध्ये सांगितले की, ही बैठक पारंपरिक औषध प्रणालीवरील दुसऱ्या जागतिक आरोग्य संघटना (WHO) जागतिक शिखर परिषदेच्या निमित्ताने झाली. या चर्चेत आयुर्वेद, युनानी आणि होमिओपॅथीसह विविध पारंपरिक औषध पद्धतींमध्ये सहकार्य वाढवण्यावर भर देण्यात आला.

हेही वाचा – Donald Trump: ‘टॅरिफ माझा आवडता विषय, 10 महिन्यांत, मी…’; डोनाल्ड ट्रम्प यांचा पुन्हा एकदा मोठा दावा

आयुष मंत्रालयाच्या मते, या संवादातून सर्वसमावेशक आणि लोककेंद्रित आरोग्यसेवेचा एक महत्त्वाचा आधारस्तंभ म्हणून पारंपरिक औषध प्रणालीला प्रोत्साहन देण्यासाठी भारत आणि अफगाणिस्तान यांची सामायिक वचनबद्धता अधोरेखित झाली. दरम्यान, याआधी केंद्रीय आरोग्य मंत्री जे. पी. नड्डा यांनीही बुधवारी अफगाणिस्तानचे मंत्री जलाली यांच्याशी फलदायी बैठक घेतली होती. या बैठकीत अफगाणिस्तानला मानवतावादी मदत आणि आरोग्यसेवा सहाय्य देण्यावर विशेष लक्ष केंद्रित करण्यात आले. भारताने औषधे आणि आरोग्य सहाय्याच्या दीर्घकालीन पुरवठ्यासह अफगाणिस्तानला सातत्यपूर्ण मानवतावादी पाठिंबा देण्याच्या आपल्या वचनबद्धतेची ग्वाही दिली.  

हेही वाचा – Indian Currency in Nepal : नेपाळमध्ये आता 500 आणि 200 च्या भारतीय नोटांना परवानगी; पर्यटकांना मोठा दिलासा

या वचनबद्धतेचा भाग म्हणून कर्करोगावरील औषधे आणि लसींचे प्रतीकात्मक हस्तांतरण करण्यात आले. याशिवाय, अफगाणिस्तानची आरोग्य प्रणाली मजबूत करण्यासाठी औषधे, लसींची मोठी खेप तसेच 128 स्लाइस सीटी स्कॅनर पाठवण्यात येत आहे. भारताच्या परराष्ट्र मंत्रालयाने जलाली यांच्या पहिल्या अधिकृत भारत दौऱ्याचे स्वागत केले होते. बदलत्या प्रादेशिक परिस्थितीतही अफगाणिस्तानच्या आरोग्य क्षेत्रासाठी भारताचा चिरस्थायी पाठिंबा आणि मानवतावादी मदतीतील सातत्य या भेटीतून स्पष्ट झाले. हा दौरा दोन्ही देशांतील अधिकृत देवाणघेवाणीच्या व्यापक प्रक्रियेचा एक भाग असल्याचेही नमूद करण्यात आले आहे.