Gold Silver Rate Today: सोने-चांदीच्या दरात पुन्हा ‘ट्विस्ट’; गुतवणूकदारांच्या काळजाचा ठोका चुकला, आजचे दर पाहा

मुंबई: सोने – चांदीच्या बाजारपेठेत सध्या कमालीची अनिश्चितता पाहायला मिळत असून, 'कधी आनंद तर कधी निराशा' अशी स्थिती गुंतवणूकदारांची झाली आहे. गेल्या महिन्यात ऐतिहासिक उच्चांक गाठल्यानंतर या मौल्यवान धातूंमध्ये झालेल्या मोठ्या विक्रीने अनेकांच्या खिशाला कात्री लावली होती. मात्र, आठवड्याच्या सुरुवातीलाच, म्हणजेच सोमवारी बाजाराने पुन्हा एकदा अनपेक्षित वळण घेतले. सोमवारी सोने-चांदीच्या किमतीत झालेली प्रचंड वाढ पाहून गुंतवणूकदारांचे डोळे विस्फारले खरे, पण मंगळवारी सकाळी बाजार उघडताच पुन्हा एकदा 'नफावसुली'चा (Profit Booking) कल दिसून आल्याने दरात किंचित नरमाई पाहायला मिळत आहे.

विक्रमी उसळीनंतर मंगळवारी 'नफावसुली'चा जोर सोमवारी ट्रेडिंग सत्रात सोन्याच्या किमतीत तब्बल 2,798 रुपयांची वाढ झाली होती, तर चांदीने 8,736 रुपयांची मोठी झेप घेत सर्वांनाच थक्क केले. मात्र, हा आनंदाचा ओघ मंगळवारी 10 फेब्रुवारी रोजी काहीसा ओसरलेला दिसला. मल्टी कमॉडिटी एक्सचेंजवर (MCX) एप्रिल सोन्याचे फ्युचर्स 1.56 लाख रुपये प्रति 10 ग्रॅमच्या आसपास रेंगाळत होते, तर मार्च चांदीचा वायदा दर 2.59 लाख रुपये प्रति किलोवर खाली आला. जागतिक स्तरावरील हालचालींमुळे देशांतर्गत बाजारातही विक्रीचा दबाव वाढल्याने ही घसरण झाल्याचे तज्ज्ञांचे मत आहे.

तुमच्या शहरातील दर; मुंबईत काय आहे स्थिती?

जर तुम्ही आज सोने खरेदीचा विचार करत असाल, तर महानगरांमधील दरांचा आढावा घेणे आवश्यक आहे. मुंबईतील सराफा बाजारात आज 24 कॅरेट 10 ग्रॅम सोन्याची किंमत 1,57,920 रुपये इतकी नोंदवण्यात आली आहे. त्याचप्रमाणे, दागिनेबनवण्यासाठी वापरल्या जाणाऱ्या 22 कॅरेट सोन्याचा भाव 1,44,760 रुपये प्रति 10 ग्रॅम आहे, तर 18 कॅरेटसाठी ग्राहकांना 1,18,450 रुपये मोजावे लागत आहेत. किमती उच्च पातळीवर असल्या तरी ग्राहकांमध्ये खरेदीसाठी  'थांबा आणि पाहा' अशी भूमिका दिसून येत आहे.

हेही वाचा: Raj Thackeray on Mohan Bhagwat : भाषा आग्रह आंदोलनाच्या मुद्द्यावरून राज ठाकरेंनी मोहन भागवतांवर साधला निशाणा, म्हणाले, 'सर्व मंडळी तुमच्या प्रेमाखातर आली नव्हती तर…'

डॉलरचा जोर आणि जागतिक घडामोडींचा परिणाम

सोने-चांदीच्या या लपंडावामागे प्रामुख्याने आंतरराष्ट्रीय कारणे आहेत. डॉलर निर्देशांकात झालेली वाढ हे महत्त्वाचे कारण ठरले आहे. सोमवारी 96.82 पर्यंत खाली आलेला डॉलर निर्देशांक मंगळवारी 97.01 पर्यंत वधारला. याशिवाय, भू-राजकीय तणाव आणि अमेरिकन मॅक्रो निर्देशांकांमधील बदल सोन्याच्या किमतींना सातत्याने 'ट्रिगर' करत आहेत. डॉलरमधील ही अस्थिरता गुंतवणूकदारांना सावध पवित्रा घेण्यास भाग पाडत आहे.

अमेरिकन फेड रिझर्व्हच्या निर्णयाकडे सर्वांचे लक्ष

जागतिक बाजारातील किमतींवर अमेरिकन फेडरल रिझर्व्हच्या व्याजदराबाबतच्या धोरणांचा मोठा प्रभाव पडत आहे. व्हाईट हाऊसचे आर्थिक सल्लागार केविन हॅसेट यांनी दिलेल्या संकेतानुसार, येत्या काही महिन्यांत अमेरिकेत नोकऱ्यांच्या निर्मितीचा वेग मंदावू शकतो. अशा परिस्थितीत, यावर्षी फेड रिझर्व्हकडून दोन वेळा व्याजदर कपात होण्याची शक्यता वर्तवली जात आहे. जर व्याजदर कपात झाली, तर सोन्याच्या किमती पुन्हा एकदा शिखराकडे कूच करू शकतात, असा अंदाज जाणकारांनी व्यक्त केला आहे.

गुंतवणूकदारांसाठी काय आहे सल्ला?

सोने-चांदीच्या दरातील ही अस्थिरता अल्पकालीन असली, तरी मध्यम ते दीर्घकालीन गुंतवणुकीसाठी या धातूंमधील कल अद्यापही सकारात्मक असल्याचे तज्ज्ञ सांगतात. सध्या बाजारात 'चढाओढ' असली तरी, घसरणीच्या वेळी टप्प्याटप्प्याने केलेली गुंतवणूक फायदेशीर ठरू शकते. मात्र, जागतिक अर्थव्यवस्थेतील अनिश्चितता पाहता गुंतवणूकदारांनी सध्याच्या अस्थिर काळात अत्यंत विचारपूर्वक पावले उचलणे गरजेचे आहे.

हेही वाचा: Chandrapur Mayor Election: चंद्रपूर महानगरपालिकेचा ‘महापौर’ कोण? ठाकरेंच्या एका निर्णयाने काँग्रेस-भाजपची धाकधूक वाढली