नेमकं कोणत्या कारणांमुळे बँकिंग सेवा दोन दिवसांसाठी बंद राहणार?

24 मार्च 2025 आणि 25 मार्च 2025 रोजी देशभरातील बँकिंग सेवांवर परिणाम होऊ शकतो. याचे कारण म्हणजे, युनायटेड फोरम ऑफ बँक युनियन्स (UFBU) ने चांगली भरती, नोकरीची सुरक्षा, पाच दिवसाच्या कामाचा आठवडा आणि इतर मागण्यांसाठी दोन दिवसांचा संप जाहीर केला आहे. ग्राहकांची 'गैरसोय होऊ नये, यासाठी महत्वाचे व्यवहार आधीच पूर्ण करा', असे आवाहन करण्यात येत आहे. 

बँक कर्मचाऱ्यांच्या प्रमुख मागण्या:

नऊ प्रमुख बँक संघटनांचे प्रतिनिधित्व करणाऱ्या युनायटेड फोरम ऑफ बँक युनियन्स (UFBU) ने इंडियन बँक्स असोसिएशन (IBA) सोबत करार न झाल्यामुळे संपाची घोषणा केली. नॅशनल कॉन्फेडरेशन ऑफ बँक एम्प्लॉईज (NCBE) चे सरचिटणीस एल चंद्रशेखर यांनी सांगितले की, अनेक चर्चा होऊनही इंडियन बँक्स असोसिएशन (IBA) ने अद्याप प्रमुख समस्या सोडवल्या नाहीत, ज्यात हे समाविष्ट आहे:

अधिक भरती: कामाचा ताण कमी करण्यासाठी आणि कार्यक्षमता वाढविण्यासाठी बँकांना सर्व स्तरांवर अतिरिक्त कर्मचाऱ्यांची आवश्यकता आहे.

रिक्त पदे भरणे: सार्वजनिक बँकांमध्ये कामगार आणि अधिकारी संचालकांसारखी महत्त्वाची पदे रिक्त आहेत.

नोकऱ्यांच्या सुरक्षिततेची चिंता: कामगार संघटनांनी सरकारकडे कामगिरीवर आधारित मूल्यांकन आणि प्रोत्साहने रद्द करण्याची मागणी केली आहे. कारण, त्यांच्या मते नोकऱ्या धोक्यात येऊ शकतात.

सरकारी नियंत्रण कमी करणे: कामगार संघटनांचा असा युक्तिवाद आहे की, जास्त सरकारी हस्तक्षेप बँक मंडळांच्या स्वायत्ततेवर मर्यादा घालतो.

वाढीव ग्रॅच्युइटी (Gratuity) फायदे: ते ग्रॅच्युइटी (Gratuity) मर्यादा 25 लाख रुपयांपर्यंत वाढवण्याची आणि आयकरातून सूट देण्याची मागणी करत आहेत.

कामगिरीशी संबंधित प्रोत्साहने आणि कर्मचाऱ्यांच्या पुनरावलोकनांवरील अलीकडील सरकारच्या निर्णयांच्याही युनायटेड फोरम ऑफ बँक युनियन्स (UFBU) विरोधात आहे. त्यांना वाटते की, ही धोरणे कामगारांमध्ये अनिश्चितता आणि तणाव निर्माण करतात. त्यामुळे, ती मागे घेतली पाहिजेत. 

युनायटेड फोरम ऑफ बँक युनियन्स (UFBU) मध्ये कोण कोणाचा समावेश आहे?

युनायटेड फोरम ऑफ बँक युनियन्स (UFBU) मध्ये ऑल इंडिया बँक एम्प्लॉईज असोसिएशन (AIBEA), ऑल इंडिया बँक ऑफिसर्स कॉन्फेडरेशन (AIBOC), नॅशनल कॉन्फेडरेशन ऑफ बँक एम्प्लॉईज (NCBE), ऑल इंडिया बँक ऑफिसर्स असोसिएशन (AIBOA), बँक एम्प्लॉईज फेडरेशन ऑफ इंडिया (BEFI), इंडियन नॅशनल बँक एम्प्लॉईज काँग्रेस (INBEC), इंडियन नॅशनल बँक ऑफिसर्स काँग्रेस (INBOC), नॅशनल ऑर्गनायझेशन ऑफ बँक वर्कर्स (NOBW) आणि नॅशनल ऑर्गनायझेशन ऑफ बँक ऑफिसर्स (NOBO) यासारख्या बँक संघटनांचा समावेश आहे.