Donald Trump: एपस्टीन फाइल्समधून ट्रम्प यांचा फोटो का हटवला होता? अखेर अमेरिकन न्याय विभागाने सत्य सांगितले

 वॉशिंग्टन डीसी : अमेरिकेच्या Department of Justice (DOJ) ने Donald Trump यांचा फोटो पुन्हा एकदा सार्वजनिक केला असून, त्या छायाचित्रात Jeffrey Epstein प्रकरणातील कोणतेही पीडित दाखवलेले नाहीत, असे स्पष्ट केले आहे. संबंधित फोटो अलीकडे जाहीर करण्यात आलेल्या एपस्टीन फाइल्सच्या संचामधील होता.

DOJ कडून देण्यात आलेल्या माहितीनुसार, न्यूयॉर्कच्या Southern District of New York (SDNY) यांनी पीडितांच्या संरक्षणाच्या दृष्टीने या फोटोबाबत पुनरावलोकन करण्याची सूचना दिली होती. त्यानंतर खबरदारीचा उपाय म्हणून हा फोटो तात्पुरता हटवण्यात आला होता.

DOJ ने सोशल मीडिया प्लॅटफॉर्म X वर स्पष्टीकरण देताना म्हटले की, “सखोल तपासणीनंतर असे आढळले आहे की या छायाचित्रात एपस्टीन प्रकरणातील कोणतेही पीडित दिसून येत नाहीत. त्यामुळे कोणताही बदल किंवा सेन्सॉर न करता हा फोटो पुन्हा प्रसिद्ध करण्यात आला आहे.”

हेही वाचा: Rohit Sharma: रोहित शर्मा घेणार होता निवृत्ती? 2023 विश्वचषकानंतरच्या 'त्या' निर्णयावर रोहितचा मोठा खुलासा

याआधी CNN ने दिलेल्या वृत्तानुसार, एपस्टीनशी संबंधित कागदपत्रांच्या अलीकडील संचातून किमान 16 फाइल्स वेबसाइटवरून हटवण्यात आल्या होत्या. यामध्ये डोनाल्ड ट्रम्प यांचा फोटोही समाविष्ट असल्याचे नमूद करण्यात आले होते. इतर हटवलेल्या फाइल्समध्ये काही चित्रकला, लिफाफ्यांनी भरलेले मेल स्लॉट, इमारतीतील कॉरिडॉरचे फोटो आणि नावे व फ्लॅट क्रमांक असलेली वही यांचा समावेश होता.

DOJ ने स्पष्ट केले आहे की विभाग पारदर्शकतेस (Transparency) पूर्णपणे बांधील आहे आणि कायद्याने आवश्यक असेल तेव्हाच माहिती हटवली जाते. कायद्यानुसार, पीडित, अल्पवयीन किंवा संभाव्य पीडितांची ओळख पटवणारी माहिती तसेच गोपनीय (Privileged) मजकूर हटवणे बंधनकारक आहे.

महत्त्वाचे म्हणजे, प्रसिद्ध व्यक्ती किंवा राजकीयदृष्ट्या प्रभावशाली लोकांचे संरक्षण करण्यासाठी कोणतीही माहिती हटवली गेलेली नाही किंवा भविष्यात हटवली जाणार नाही, असे DOJ ने ठामपणे सांगितले आहे. काही व्यक्तींनी स्वतःला पीडित म्हणून ओळख देत किंवा त्यांच्या वकिलांमार्फत माहिती हटवण्याची मागणी केल्याने संबंधित मजकूर तात्पुरता हटवून कायदेशीर तपासणीनंतर पुन्हा प्रसिद्ध करण्यात येतो, असेही स्पष्ट करण्यात आले आहे.

या प्रकरणामुळे अमेरिकेत पारदर्शकता, गोपनीयता आणि पीडितांच्या संरक्षणाबाबत पुन्हा एकदा चर्चा सुरू झाली असून, DOJ च्या भूमिकेकडे मोठ्या प्रमाणात लक्ष वेधले जात आहे.

हेही वाचा: PM Modi on Maharashtra Election: 'महाराष्ट्र विकासाच्या बाजूने खंबीरपणे…'; महायुतीच्या विजयानंतर पंतप्रधान मोदींची पहिली प्रतिक्रिया