Cockroach Janta Party Movie: जंतर-मंतरपासून रुपेरी पडद्यापर्यंत! ‘कॉकरोच जनता पार्टी’च्या आंदोलनावर बनणार चित्रपट?

नीट (NEET) पेपरफुटी प्रकरणानंतर देशभरात उसळलेल्या विद्यार्थी आंदोलनाने शिक्षण व्यवस्था आणि राजकारण या दोन्ही क्षेत्रांत मोठी खळबळ उडवून दिली होती. दिल्लीतील जंतर-मंतरवर 'कॉकरोच जनता पार्टी'ने केलेल्या आंदोलनाने राष्ट्रीय पातळीवर लक्ष वेधून घेतले होते. या आंदोलनानंतर घडलेल्या राजकीय घडामोडी, आंदोलनामागील रणनीती, पडद्यामागे झालेल्या चर्चा आणि त्यावेळी घडलेल्या अनेक घटनांवर आता मोठ्या पडद्यावर चित्रपट साकारला जाणार आहे. 'द ॲक्सिडेंटल कॉकरोच पार्टी' (The Accidental Cockroach Party) या नावाने येणारा हा चित्रपट केवळ आंदोलनाची कथा मांडणार नसून, त्या काळातील राजकीय वातावरण, निर्णयप्रक्रिया आणि आजपर्यंत समोर न आलेल्या अनेक पैलूंवर प्रकाश टाकणार असल्याचा दावा केला जात आहे. चित्रपटाची घोषणा होताच त्याच्या विषयाबाबत आणि कलाकारांबाबत चर्चा सुरू झाली आहे.

 आंदोलनाची कथा रुपेरी पडद्यावर

नीट पेपरफुटीच्या पार्श्वभूमीवर 'कॉकरोच जनता पार्टी'ने दिल्लीतील जंतर-मंतरवर केंद्रीय शिक्षणमंत्र्यांच्या राजीनाम्याच्या मागणीसाठी मोठे आंदोलन उभारले होते. या आंदोलनात देशभरातून हजारो विद्यार्थी सहभागी झाले होते. शिक्षण व्यवस्थेतील पारदर्शकता, परीक्षा प्रक्रियेतील त्रुटी आणि विद्यार्थ्यांच्या भवितव्याचा मुद्दा यामुळे हे आंदोलन राष्ट्रीय चर्चेचा विषय ठरले. आता त्याच आंदोलनावर आधारित चित्रपटाची निर्मिती केली जात असून, त्यामधून आंदोलनाशी संबंधित अनेक घटनांचा मागोवा घेतला जाणार आहे.

 संशोधनानंतर चित्रपटाची घोषणा

या चित्रपटाची कथा आणि पटकथा जयपूरचे गोविंद देव ब्रह्म यांनी तयार केली आहे. आंदोलनाशी संबंधित विविध घटना, उपलब्ध कागदपत्रे आणि घडामोडींचा अभ्यास केल्यानंतरच या चित्रपटाची अधिकृत घोषणा करण्यात आल्याची माहिती समोर आली आहे. चित्रपटात केवळ आंदोलनाचे चित्रण न करता त्यामागील नियोजन, रणनीती आणि पडद्यामागे घडलेल्या घटनांवरही प्रकाश टाकला जाणार असल्याचा दावा केला जात आहे.

चित्रपटाच्या नावाची चर्चा

चित्रपटाच्या घोषणेनंतर त्याच्या शीर्षकाचीही मोठ्या प्रमाणावर चर्चा सुरू झाली आहे. 'द ॲक्सिडेंटल कॉकरोच पार्टी' हे शीर्षक अधिकृतपणे नोंदवण्यात आले असून, त्यामागील अर्थ आणि संदर्भ जाणून घेण्याची उत्सुकता अनेकांना लागली आहे. राजकीय पार्श्वभूमीवर आधारित या चित्रपटामुळे प्रदर्शनापूर्वीच चर्चा रंगू लागली आहे.

 20 कोटींपेक्षा अधिक बजेट

हा चित्रपट माहितीपट नसून मोठ्या बजेटचा फिचर फिल्म प्रकल्प असल्याचे सांगितले जात आहे. उपलब्ध माहितीनुसार, या चित्रपटासाठी 20 कोटी रुपयांहून अधिक खर्च केला जाणार आहे. सध्या पटकथेवर अंतिम काम सुरू असून, चित्रिकरणासाठी विविध ठिकाणांची पाहणी केली जात आहे. लवकरच शूटिंगला सुरुवात होण्याची शक्यता व्यक्त केली जात आहे.

 अभिजीत दिपकेंची भूमिका कोण साकारणार?

चित्रपटाच्या घोषणेनंतर कॉकरोच जनता पार्टीचे संस्थापक अभिजीत दिपके यांची भूमिका कोणता अभिनेता साकारणार, याची चर्चा चित्रपटसृष्टीत सुरू झाली आहे. अद्याप कोणत्याही कलाकाराच्या नावावर शिक्कामोर्तब झालेले नसले तरी प्रमुख भूमिकांसाठी काही बड्या कलाकारांशी चर्चा सुरू असल्याची माहिती समोर येत आहे.

2027 मध्ये प्रदर्शित होण्याची शक्यता

चित्रपटाचे दिग्दर्शक, प्रमुख कलाकार आणि सहनिर्मात्यांची निवड अंतिम टप्प्यात असल्याचे सांगितले जात आहे. मुंबईतील काही मोठ्या निर्मिती संस्थांशी याबाबत चर्चा सुरू असून, सर्व प्रक्रिया वेळेत पूर्ण झाल्यास हा चित्रपट 2027 मध्ये प्रदर्शित करण्याचे नियोजन आहे. मात्र, प्रदर्शनाची अधिकृत तारीख अद्याप जाहीर करण्यात आलेली नाही.