Abhijeet Dipke: अभिजीत दिपके बसणार उपोषणाला, पण आरोग्याची ‘ही’ समस्या ठरतेय अडचणीची

जंतर मंतरवरील आंदोलनात मोठा बदल झाला आहे. सामाजिक कार्यकर्ते सोनम वांगचुक यांना पोलिसांनी आंदोलनस्थळावरून हटवल्यानंतर आता कॉक्रोच जनता पार्टी (सीजेपी)चे संस्थापक अभिजीत दीपके यांनी उपोषणाची धुरा हाती घेतली आहे. मात्र, त्यांच्या या निर्णयामुळे आंदोलनासोबतच त्यांच्या प्रकृतीबाबतही चर्चा सुरू झाली आहे. यामागचे कारण म्हणजे दीपके यांनी यापूर्वीच आपण मायग्रेनच्या त्रासाने ग्रस्त असल्याचे जाहीरपणे सांगितले होते.

आरोग्याच्या अडचणी असूनही घेतला निर्णय

उपोषणासारखा कठीण मार्ग स्वीकारणे आपल्या प्रकृतीसाठी सोपे नसल्याचे अभिजीत दीपके यांनी यापूर्वी अनेकदा स्पष्ट केले होते. वेळेवर अन्न न मिळाल्यास मायग्रेनचा त्रास वाढतो, त्यामुळे दीर्घकाळ उपाशी राहणे कठीण जाते, असे त्यांनी एका मुलाखतीत सांगितले होते. तरीही आंदोलनाची दिशा कायम ठेवण्यासाठी त्यांनी उपोषण सुरू करण्याचा निर्णय घेतला.

सोशल मीडियावरील टीकेनंतर दिले होते स्पष्टीकरण

सोनम वांगचुक उपोषण करत असताना सोशल मीडियावर दीपके यांचे जेवण करतानाचे काही व्हिडिओ व्हायरल झाले होते. त्यानंतर आंदोलनाचे नेतृत्व करणारी व्यक्ती स्वतः उपोषण का करत नाही, असा सवाल अनेकांनी उपस्थित केला. या टीकेला उत्तर देताना दीपके यांनी आपल्या आरोग्याच्या समस्येबरोबरच आंदोलनातील जबाबदाऱ्यांचाही उल्लेख केला होता.

आंदोलनाच्या व्यवस्थापनाची जबाबदारी

नीट पेपरफुटी प्रकरणात केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी 20 जूनपासून सुरू असलेल्या आंदोलनाचे नियोजन आणि समन्वयाची जबाबदारी दीपके यांच्याकडे असल्याचे सांगितले जाते. आंदोलकांशी सातत्याने संपर्क ठेवणे, कार्यक्रमांचे नियोजन करणे आणि संपूर्ण आंदोलन सुरळीत सुरू राहील यासाठी सक्रिय राहणे आवश्यक असल्याने त्यांनी सुरुवातीला उपोषणात सहभागी न होण्याचा निर्णय घेतला होता.

'माझ्यासाठी उपोषण सोपे नाही'

एका यूट्यूब मुलाखतीत बोलताना दीपके म्हणाले होते की, "मला मायग्रेनचा त्रास आहे. वेळेवर जेवलो नाही तर तीव्र डोकेदुखी सुरू होते. त्यामुळे उपोषण करणे माझ्यासाठी मोठे आव्हान आहे." त्यांच्या या वक्तव्यामुळे त्यावेळी त्यांनी उपोषण टाळल्याचे कारण स्पष्ट झाले होते.

आता प्रकृतीकडेही लागले सर्वांचे लक्ष

अमेरिकेत शिक्षण घेतल्यानंतर भारतात परतलेल्या अभिजीत दीपके यांनी काही काळ आम आदमी पक्षासोबतही काम केले होते. मात्र, दीर्घकालीन उपोषणाचा अनुभव नसताना त्यांनी सुरू केलेल्या या आंदोलनामुळे आता त्यांच्या आरोग्याचीही चिंता व्यक्त केली जात आहे. पुढील काही दिवसांत त्यांच्या प्रकृतीवर आणि आंदोलनाच्या पुढील दिशेवर सर्वांचे लक्ष लागले आहे.