Iran War : होर्मुजमध्ये 24 जहाजे अडकली; आखाती युद्धात 23,000 भारतीय नाविकांचा जीव धोक्यात! केंद्र सरकार अलर्ट मोडवर

Iran War : अमेरिका-इस्रायल आणि इराण यांच्यात सुरू असलेल्या युद्धामुळे आखाती प्रदेशात तणाव शिगेला पोहोचला असून, सुमारे 23,000 भारतीय नाविक सध्या या संकटग्रस्त भागात अडकले आहेत. बंदरे, जहाजबांधणी आणि जलमार्ग मंत्रालयाने शुक्रवारी ही माहिती दिली. विशेषतः ‘स्ट्रेट ऑफ होर्मुज’च्या पश्चिम भागात 24 जहाजांवर 677 भारतीय नाविक आणि पूर्व भागात 76 नाविक तैनात आहेत. सरकार या सर्व नाविकांच्या सुरक्षिततेवर बारकाईने लक्ष ठेवून असून, गुरुवारी ‘जग प्रकाश’ हे जहाज या धोकादायक क्षेत्रातून सुरक्षितपणे बाहेर पडले आहे.

भारतीय नाविकांची जीवितहानी आणि शोधमोहीम
युद्ध सुरू झाल्यापासून आतापर्यंत झालेल्या हल्ल्यांमध्ये 3 भारतीय नाविकांचा मृत्यू झाला असून 4 जण जखमी झाले आहेत. मार्चच्या पहिल्या आठवड्यात ‘Skylight’ या तेलवाहू जहाजावर झालेल्या हल्ल्यात आशिष कुमार आणि दलीप सिंह या दोन भारतीयांना आपला जीव गमवावा लागला, तर मुंबईचे दीक्षित सोलंकी अद्याप बेपत्ता आहेत. तसेच, इराकच्या किनारपट्टीजवळ ‘सेफसी विष्णू’ या जहाजावरील हल्ल्यात एका भारतीय नाविकाचा मृत्यू झाला, तर अन्य 15 जणांना सुखरूप वाचवण्यात यश आले आहे.

हेही वाचा – Afghanistan Pakistan War: जग अशांततेच्या मार्गावर; इराण-इस्रायलनंतर अफगाणिस्तान-पाकिस्तान युद्ध पेटले, जोरदार एअरस्ट्राइक

18 व्यापारी जहाजे निशाण्यावर
जिओ-इंटेलिजेंस तज्ज्ञांच्या मते, 28 फेब्रुवारी 2026 रोजी युद्ध भडकल्यापासून आतापर्यंत किमान 18 जहाजांना लक्ष्य करण्यात आले आहे. या हल्ल्यांसाठी इराण किंवा त्यांच्या समर्थक सशस्त्र गटांना जबाबदार धरले जात आहे. आखाती प्रदेशातील सागरी परिस्थिती वेगाने बदलत असून, व्यापारी जहाजांवरील हल्ल्यांमुळे जागतिक पुरवठा साखळीवर मोठा परिणाम झाला आहे. भारतीय अधिकारी, जहाज व्यवस्थापन कंपन्या आणि भरती संस्थांसोबत मिळून केंद्र सरकार या गंभीर परिस्थितीवर तोडगा काढण्याचा प्रयत्न करत आहे.

केंद्र सरकारचे मदत आणि समन्वय कार्य
भारतीय दूतावास आणि स्थानिक प्रशासनाच्या माध्यमातून अडकलेल्या नाविकांशी संपर्क प्रस्थापित केला जात आहे. जखमी नाविकांना सुरक्षित स्थानी हलवून त्यांच्यावर उपचार सुरू करण्यात आले आहेत. मंत्रालयाचे विशेष सचिव राजेश कुमार सिन्हा यांनी सांगितले की, गरज पडल्यास नाविकांना वैद्यकीय मदत आणि तात्काळ सुटका करण्यासाठी यंत्रणा सज्ज ठेवण्यात आली आहे. समुद्रातील प्रत्येक हालचालीवर लक्ष ठेवण्यासाठी भारत आंतरराष्ट्रीय सागरी सुरक्षा दलांच्या संपर्कात असून नाविकांच्या कुटुंबीयांनाही दिलासा देण्याचे काम सुरू आहे.

हेही वाचा – Iran Israel US Conflict: ‘इराणमध्ये कोणीही सुरक्षित नाही’; इराणच्या नव्या सर्वोच्च नेत्याला इस्रायलचे पंतप्रधान नेतन्याहू यांच्याकडून इशारा