वैजापूरमध्ये आदित्यच्या गाडीवर दगडफेक

महाराष्ट्रातील औरंगाबादमध्ये उद्धव ठाकरे गट नेते आदित्य यांच्या ताफ्यावर दगडफेकीची घटना समोर आली आहे. आदित्य ठाकरे पक्षाच्या शिवसंवाद यात्रेदरम्यान औरंगाबादमधील वैजापूर भागात उपस्थित असताना त्यांच्या ताफ्यावर ही दगडफेक करण्यात आली आहे. आदित्य ठाकरे यांची शिवसंवाद यात्रा सातव्या टप्प्यात आहेत. औरंगाबादच्या महालगाव येथे काल असलेल्या कार्यक्रमात गोंधळ पाहायला मिळाला. हा हल्ला शिंदे गटातील आमदारांच्या कार्यकर्त्यांनी केला असल्याचा आरोप विधानपरिषदेचे विरोधी पक्षनेते अंबादास दानवे यांनी केला आहे.

आदित्य ठाकरे यांची वैजापूर इथे सभा होती. सभेत काही समाजकंटकांनी गोंधळ घालण्याचा प्रयत्न केला असं ठाकरे गट आणि विधान परिषदेचे विरोधी पक्ष नेते अंबादास दानवे म्हणाले. “सभा सुरू असताना व्यासपीठावर एक दगड आला. सभास्थानाहून निघताना आणखी काही दगड आले. समाजकंटकांचा हा प्रयत्न आहे. आमदार रमेश बोरनारे झिंदाबादच्या घोषणा जमाव देत होता.” असे दानवे म्हणाले.

“दलित समाज आणि हिंदू समाजात भांडण लावण्याचा प्रयत्न या जमावातील लोक करत होते. शिवशक्ती आणि भीमशक्ती एकत्र येत असताना काही लोक मुद्दामहून हे बिघडवण्याचा प्रयत्न करत आहेत. याचा आम्ही निषेध करतो. राज्यातल्या सरकारकडून विविध समाजांमध्ये भांडणं लावण्याचा प्रयत्न आहे,” असे दानवे म्हणाले.