Microsoft 365 Copilot Update: मायक्रोसॉफ्टची 365 Copilot अंतर्गत नवी झेप; ‘Agent Mode’ आणि ‘Office Agent’ फीचर्सची केली घोषणा… आता तुमची ही कामे होणार अगदी सहज

मायक्रोसॉफ्टने आपल्या 365 कोपायलटमध्ये दोन नवी फीचर्स आणली आहेत. Agent Mode आणि Office Agent. या अपडेटमुळे एक्सेल, वर्ड आणि पॉवरपॉईंटमध्ये काम करणं आता अधिक सोपं आणि जलद होणार आहे.

Agent Mode मुळे वापरकर्ते फक्त एक साधा प्रॉम्प्ट (सूचना) देऊन एक्सेलमध्ये स्प्रेडशीट्स किंवा वर्डमध्ये डॉक्युमेंट्स तयार करू शकतात. उदाहरणार्थ, तुम्ही “मासिक बजेट तयार करा” असं लिहिलं की कोपायलट त्यावर टेबल तयार करेल, चुका दुरुस्त करेल आणि गरज पडल्यास पुन्हा बदल करून देईल. लवकरच हेच फीचर पॉवरपॉईंटमध्येही येणार आहे.

वर्डसाठीचे Agent Mode वापरकर्त्यांना लेखन अधिक संवादात्मक पद्धतीने करण्याची सुविधा देते. म्हणजे, तुम्ही “ग्राहकांचा फीडबॅक संक्षेप करा” असा आदेश दिलात, तर कोपायलट पहिला मसुदा लिहून देईल आणि पुढे तुमच्या सूचनांनुसार मजकूर सुधारेल. त्यामुळे तुम्हाला याचा अनुभव एका व्यक्तीसोबत संवाद साधत असल्यासारखा वाटू शकेल.

Office Agent फीचर कोपायलट चॅटमध्ये वापरता येईल. यात तुम्ही फक्त एका वाक्यात सूचना दिल्या तरी ते संपूर्ण पॉवरपॉईंट प्रेझेंटेशन किंवा वापरण्यास तयार योग्य वर्ड डॉक्युमेंट बनवून देईल. यामुळे प्रेझेंटेशन तयार करण्यासाठी लागणारा वेळ मोठ्या प्रमाणात वाचेल.

मायक्रोसॉफ्टच्या मते, या नवीन साधनांमुळे वापरकर्त्यांचा वेळ वाचेल, गुंतागुंतीची कामे सोपी होतील आणि दस्तऐवज अधिक व्यावसायिक पद्धतीने तयार होतील. कंपनी पुढील काही महिन्यांत या फीचर्समध्ये आणखी सुधारणा करणार आहे.