Silver Jewellery Ban: केंद्र सरकारने घेतला महत्त्वाचा निर्णय; साध्या चांदीच्या दागिन्यांच्या आयातीवर निर्बंध

Silver Jewellery Ban: केंद्र सरकारने साध्या चांदीच्या दागिन्यांच्या आयातीवर मोठा निर्बंध लावला आहे. नवीन निर्णयानुसार, 31 मार्च 2026 पर्यंत भारतात साध्या चांदीचे दागिने आणण्यासाठी सरकारी परवाना अनिवार्य केला आहे. यामागे सरकारचा उद्देश स्थानिक दागिने उद्योगाचे रक्षण करणे, लघु आणि मध्यम व्यवसायांना संधी देणे आणि FTA (मुक्त व्यापार करार) चा गैरवापर रोखणे असा आहे.

गेल्या काही महिन्यांत सोन्या आणि चांदीच्या किमती सतत वाढत आहेत. सोन्याचा भाव लाखांच्या पलीकडे गेला आहे तर चांदीची किंमत दीड लाखाच्या आसपास पोहोचली आहे. अशा परिस्थितीत, सामान्य नागरिकांसाठी चांदीची खरेदी कठीण झाली आहे. मात्र या दरम्यान परदेशातून मोठ्या प्रमाणात चांदीच्या दागिने आयात होत असल्याचे आढळले, जे स्थानिक उद्योगासाठी धोका ठरू शकते.

DGFT (परराष्ट्र व्यापार महासंचालनालय) ने दिलेल्या अधिसूचनेनुसार, आधी साध्या चांदीच्या दागिन्यांची आयात मोकळ्या स्वरूपात होती. परंतु, अनेक परदेशी उत्पादकांनी मुक्त व्यापार करारांचा फायदा घेत 'साध्या' या श्रेणीत दागिने आणले आणि त्यामुळे करचुकवेगिरीसह देशांतर्गत उद्योगांना तोटा झाला. सरकारने हे लक्षात घेत, आयातीवर तातडीने निर्बंध लावण्याचे निर्णय घेतला. आता या आयातसाठी सरकारी परवाना घेणे अनिवार्य केले आहे.

हेही वाचा: GST Rate Cut: GST कपातीचा लाभ न मिळाल्यास तक्रार नोंदवा; टोल-फ्री आणि WhatsAppवर सुविधा

या निर्णयामुळे भारतातील लाखो लहान कारागीर आणि दागिने व्यवसायांचे संरक्षण होईल, असा सरकारचा विश्वास आहे. साध्या चांदीच्या दागिन्यांच्या आयातीवर निर्बंध घालून स्थानिक उत्पादकांना समान संधी मिळेल आणि त्यांच्या व्यवसायाचे भवितव्य सुरक्षित राहील. तसेच या निर्णयामुळे रोजगाराची संधी टिकून राहील आणि दागिने उद्योगात होणाऱ्या परकीय स्पर्धेवर नियंत्रण राहील.

तथापि, ही बंदी फक्त साध्या चांदीच्या दागिन्यांवर लागू आहे. औद्योगिक वापरासाठी, भांडी, नाणी किंवा इतर चांदीच्या वस्तूंवर ही बंदी लागू होत नाही, कारण या क्षेत्रात FTA चा गैरवापर होत नव्हता.

सरकारच्या या पावलामुळे चांदी उद्योगाला नवीन दिशा मिळेल आणि स्थानिक व्यवसायांची मजबुती होईल. बाजारात वाढलेल्या किमती आणि परदेशी आयातीत झालेल्या वाढीमुळे होणाऱ्या प्रतिकूल परिणामांवर नियंत्रण मिळेल, असा सरकारचा दावा आहे. या बंदीमुळे आता भारतातील ग्राहकांना आयातित दागिन्यांच्या तुलनेत स्थानिक उत्पादकांकडून गुणवत्तापूर्ण आणि परवडणारे दागिने खरेदी करण्याची संधी मिळेल.

केंद्र सरकारने साध्या चांदीच्या दागिन्यांच्या आयातीवर तात्पुरती बंदी लावून स्थानिक उद्योगाचे संरक्षण करण्याचा, लघु व्यवसायांना चालना देण्याचा आणि रोजगार टिकवण्याचा महत्त्वाचा निर्णय घेतला आहे.