CJP आंदोलनावरून भारत-पाकिस्तान आमनेसामने! भारताचा पाकिस्तानला कडक इशारा, नेमकं प्रकरण काय?
नवी दिल्ली: दिल्लीतील जंतर-मंतर येथे झालेल्या विद्यार्थी आणि CJP (कॉकरोच जनता पक्ष) यांच्या आंदोलनानंतर आता या प्रकरणाला आंतरराष्ट्रीय स्तरावरही राजकीय रंग चढताना दिसत आहे. पाकिस्तानातील काही Gen Z गटांनी सोशल मीडियाच्या माध्यमातून या आंदोलनाला पाठिंबा दर्शवल्यानंतर भारत सरकारने पाकिस्तानला थेट आणि स्पष्ट शब्दांत इशारा दिला आहे.
परराष्ट्र मंत्रालयाचे प्रवक्ते रणधीर जयस्वाल यांनी प्रसारमाध्यमांशी संवाद साधताना भारताच्या अंतर्गत विषयांवर भाष्य करण्याऐवजी पाकिस्तानने आपल्या भूमीतून सुरू असलेल्या सीमापार दहशतवादाचा अंत करण्यावर लक्ष केंद्रित करावे, असे ठामपणे सांगितले. त्यांनी म्हटले की, अनेक दशकांपासून भारताविरोधात दहशतवादी कारवायांना आश्रय आणि पाठबळ मिळत असल्याची वस्तुस्थिती जगापासून लपलेली नाही.
दिल्लीतील आंदोलनानंतर पाकिस्तानातील काही तरुणांनी सोशल मीडियावर भारतीय आंदोलकांबद्दल सहानुभूती व्यक्त केली होती. या पार्श्वभूमीवर विचारलेल्या प्रश्नाला उत्तर देताना जयस्वाल यांनी स्पष्ट केले की, भारतातील तरुणांची प्राथमिक अपेक्षा ही पाकिस्तानने दहशतवादाला मिळणारे समर्थन थांबवावे, हीच आहे. पाकिस्तानातील नागरिक आणि तरुणांनीही या मुद्द्याकडे गांभीर्याने पाहावे, असे त्यांनी नमूद केले.
दरम्यान, पाकिस्तानच्या परराष्ट्र मंत्रालयाने या आंदोलनावर अधिकृत प्रतिक्रिया देण्याचे टाळले आहे. हा भारताचा अंतर्गत विषय असल्याचे सांगत त्यांनी भाष्य करण्यास नकार दिला. मात्र, सोशल मीडिया प्लॅटफॉर्मवर काही पाकिस्तानी युवकांनी दोन्ही देशांच्या ऐतिहासिक संबंधांचा उल्लेख करत आंदोलनाला पाठिंबा दिल्याची चर्चा रंगली.
याचवेळी सिंधू संस्कृतीच्या वारशावरून सुरू असलेल्या चर्चेलाही या वादाची जोड मिळाली. पाकिस्तानकडून करण्यात आलेल्या काही दाव्यांना उत्तर देताना भारताने बहुलतावादी सांस्कृतिक परंपरा आणि वारशाबाबत भाष्य करण्यापूर्वी अल्पसंख्याकांच्या हक्कांबाबत स्वतःची भूमिका सुधारण्याची गरज असल्याचे स्पष्ट केले.
भारताने पुन्हा एकदा सीमापार दहशतवाद हा दोन्ही देशांमधील संबंधांतील सर्वात गंभीर मुद्दा असल्याचे अधोरेखित केले. दहशतवाद आणि हिंसाचाराला पाठबळ मिळत असताना इतर विषयांवर नैतिक भूमिका घेण्याचा प्रयत्न योग्य नसल्याचेही परराष्ट्र मंत्रालयाने नमूद केले.
दिल्लीतील आंदोलनानंतर सुरू झालेल्या या नव्या वादामुळे भारत-पाकिस्तान संबंधांमध्ये पुन्हा एकदा तणावाचे वातावरण निर्माण झाले आहे. सोशल मीडियावरील प्रतिक्रिया, राजकीय आरोप-प्रत्यारोप आणि दोन्ही देशांच्या अधिकृत भूमिकांमुळे या विषयाकडे आता राष्ट्रीयच नव्हे तर आंतरराष्ट्रीय स्तरावरही लक्ष वेधले जात आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.