Dharmendra Pradhan:‘मंत्रीपद माझ्यासाठी…’ धर्मेंद्र प्रधानांचा राजीनाम्यानंतर मोठा खुलासा, Gen Z आणि NEET आंदोलनावर काय म्हणाले?

नवी दिल्ली: केंद्रीय शिक्षणमंत्रीपदाचा राजीनामा दिल्यानंतर भाजप नेते धर्मेंद्र प्रधान यांनी पहिल्यांदाच या निर्णयामागची भूमिका स्पष्ट केली आहे. NEET पेपर लीक प्रकरणावरून देशभरात वातावरण तापले असताना विद्यार्थ्यांमध्ये निर्माण झालेल्या असंतोषाचा त्यांनी उल्लेख केला. काही घटकांकडून Gen Z मधील तरुणांची दिशाभूल करण्याचा प्रयत्न झाल्याचा दावा प्रधान यांनी केला.

भुवनेश्वर येथील GM विद्यापीठातील कार्यक्रमात विद्यार्थी आणि शिक्षकांशी संवाद साधताना प्रधान यांनी आपल्या राजीनाम्याबाबत भाष्य केलं. त्यांच्या म्हणण्यानुसार, तरुण पिढी ही देशाच्या भविष्यासाठी अत्यंत महत्त्वाची असून तिच्या आकांक्षा समजून घेण्याची गरज आहे. 'Gen Z ही आमची मुलं आहेत,' असं म्हणत त्यांनी या पिढीबाबत सकारात्मक भूमिका मांडली.

प्रधान यांनी सांगितलं की, देशात दरवर्षी मोठ्या संख्येने तरुण पिढी तयार होत आहे. शिक्षण, रोजगार आणि भविष्यातील संधींबाबत या तरुणांच्या अपेक्षा आहेत. हीच पिढी भारताला पुढे नेण्याची ताकद ठेवते. त्यामुळे मंत्रीपदापेक्षा देशातील तरुणांचं भविष्य त्यांच्यासाठी अधिक महत्त्वाचं असल्याचं त्यांनी स्पष्ट केलं.

हेही वाचा: Raghav Chaddha meets PM Modi : महत्त्वाच्या जबाबदारीचे संकेत! भाजप खासदार राघव चड्ढांनी घेतली पंतप्रधान मोदींची भेट

NEET पेपर लीक प्रकरणाच्या पार्श्वभूमीवर विद्यार्थ्यांमध्ये असंतोष निर्माण झाला होता. याच काळात दिल्लीतील जंतर-मंतरवर आंदोलनही झालं. या घडामोडींनंतर 25 जुलै रोजी प्रधान यांनी केंद्रीय शिक्षणमंत्रीपदाचा राजीनामा दिला होता. पंतप्रधान नरेंद्र मोदी यांची भेट घेऊन मंत्रिमंडळातून बाहेर पडण्याची इच्छा व्यक्त केल्याचंही त्यांनी सांगितलं.

दरम्यान, ओडिशामध्येही धर्मेंद्र प्रधान यांच्या विरोधात राजकीय वातावरण तापल्याचं पाहायला मिळालं. विमानतळ परिसरात बीजेडीच्या युवा आणि विद्यार्थी कार्यकर्त्यांनी त्यांच्या विरोधात ‘गो बॅक’च्या घोषणा दिल्या होत्या. यावर प्रतिक्रिया देताना प्रधान यांनी आपण अशा घोषणांनी विचलित होत नसल्याचं सांगितलं.

'मी शेतकऱ्याचा मुलगा आहे. मला परत जाण्यास सांगितलं तरी मी पुन्हा येईन,' असं म्हणत त्यांनी विरोधकांना प्रत्युत्तर दिलं. ओडिशाची प्रतिष्ठा कमी होईल किंवा राज्याच्या जनतेची मान खाली जाईल, असं कोणतंही काम आपण करणार नसल्याचंही त्यांनी स्पष्ट केलं.

हेही वाचा: LPG Import Policy: गॅससाठी भारताचा नवा मास्टरप्लॅन; 67 टक्के LPG 'या' एकाच देशातून होणार आयात

प्रधान यांनी आपल्या राजकीय प्रवासाचा उल्लेख करताना भगवान जगन्नाथ आणि संबळपूरच्या देवी समलेश्वरी यांच्या आशीर्वादाचा दाखला दिला. नवीन पटनायक यांच्या आशीर्वादामुळे आपण केंद्रीय मंत्री झालो नसल्याचंही त्यांनी स्पष्ट केलं.

एकूणच, राजीनाम्यानंतर धर्मेंद्र प्रधान यांनी प्रथमच आपली भूमिका सार्वजनिकपणे मांडली असून Gen Z, विद्यार्थी आंदोलन आणि ओडिशातील राजकीय विरोध या तिन्ही मुद्द्यांवर त्यांनी भाष्य केलं आहे.