Rohini Acharya : ‘तुम्हाला चपलेनं मारलं जाईल…, त्यांनीच मला कुटुंबातून बाहेर काढलं’; रोहिणी आचार्य यांचे कुटुंबियांबाबत धक्कादायक खुलासे

बिहार: आरजेडी (Rashtriya Janata Dal) प्रमुख लालू प्रसाद यादव यांच्या मुलगी रोहिणी आचार्य यांनी जोरदार आरोप करीत कुटुंब व पार्टीपासून दूर जाण्याचा निर्णय जाहीर केल्यानंतर बिहारची राजकीय परिस्थिती ढवळून निघाली आहे. पाटणा विमानतळावर पोहोचताना रोहिणी यांनी स्पष्ट शब्दांत सांगितले, “माझं आता कोणतंही कुटुंब नाही. तुम्ही तेजस्वी यादव, संजय यादव आणि रमीज यांना विचारा. मला घरातून त्यांनीच हाकललं. जबाबदारी घ्यायची कुणाची तयारी नाही. पक्ष का हरला, हा प्रश्न देश विचारतोय. पण या लोकांची नावं घेतली की अपमान, शिवीगाळ आणि पक्षातून हकालपट्टी हेच मिळतं.” बिहार विधानसभा निवडणूक 2025 चे निकाल नोव्हेंबरला जाहीर झाले आणि महागठबंधनला मोठा धक्का बसला. आरजेडी फक्त 25 जागांवर सीमित राहिली. निकालानंतरच्या दुसऱ्याच दिवशी रोहिणी यांनी सोशल मीडिया प्लॅटफॉर्म X वरून राजकारण आणि कुटुंब दोन्हीपासून नाते तोडत असल्याची घोषणा केली. त्यांच्या या पोस्टने आरजेडीच्या आंतरिक वादाला अधिक उघडे केले.

रोहिणी यांनी लिहिले की, संजय यादव आणि रमीज यांनी त्यांना पार्टी सोडण्यास भाग पाडले आणि त्या सर्व दोष स्वतःवर घेत आहेत. त्यांचा स्वर अत्यंत तीव्र होता आणि कुटुंबाच्या विरोधातील त्यांच्या नाराजीचे स्पष्ट दर्शन त्यातून दिसले. या प्रकरणावर बिहार भाजप (Bharatiya Janata Party) अध्यक्ष दिलीप जायसवाल यांनी प्रतिक्रिया देताना सांगितले की हे लालू यादव यांच्या कुटुंबाचे आंतरिक प्रकरण आहे. मात्र, एका व्यक्तीमुळे कुटुंब फुटू नये आणि लालू प्रसाद यादव व राबडी देवी यांनी परिस्थिती सांभाळावी, अशी विनंती त्यांनी केली. जेडीयू (Janata Dal United) चे प्रमुख नेते नीरज कुमार यांनी मात्र अधिक कठोर भूमिका घेतली. त्यांनी लालूंना ‘राजकारणातील धृतराष्ट्र’ अशी उपमा देत विचारले की, “ज्या मुलीने किडनीदान करून त्यांचे प्राण वाचवले, तिच्या वेदना त्यांना ऐकू येत नाहीत का?” नीरज कुमार यांच्या या वक्तव्यामुळे वाद आणखी चिघळला.

हेही वाचा: Ladki Bahin Yojana Update : बहिणींनो तयार व्हा! योजनेबद्दल मोठ्या घोषणेची शक्यता

आरजेडीतील वाद आधीच वाढलेला होता. काही महिन्यांपूर्वी तेज प्रताप यादव यांना पक्षातून काढण्यात आले होते. त्यांनी नेहमीप्रमाणे रोहिणी यांच्या निर्णयाला सपोर्ट दिला आणि विरोधकांविरोधात “सुदर्शन चक्र” असा उल्लेख करीत भावनिक संदेश दिला. रोहिणी यांची नाराजी विशेषतः संजय यादववर केंद्रित आहे. पार्टीतील तिकीटवाटप आणि महत्वाच्या निर्णयांमध्ये संजयचा अतिरेक हस्तक्षेप असल्याचा आरोप लालू कुटुंबातील अनेकांनी यापूर्वीही केला आहे. तेज प्रताप यांनी तर त्यांना “जयचंद” अशी उपाधी दिली होती. रोहिणीच्या आरोपांमध्ये रमीजचे नावही तितक्याच तीव्रतेने आले.

रमीज हा उत्तर प्रदेशचा असून तो तेजस्वी यादवसोबत एका क्रिकेट क्लबमध्ये खेळत असे. त्याचे सासरे रिजवान जहीर हे सपा (Samajwadi Party) चे माजी खासदार असून 2022 मधील हत्या प्रकरणात तुरुंगात आहेत. गेल्या 2 वर्षांत रमीजने तेजस्वी यांची टीम मजबूतपणे हाताळली असून या निवडणुकीत वॉर रूमची जबाबदारी त्याच्याकडे होती. रमीज, अदनान, शारिक आणि संजय यादव मिळून तेजस्वीची कोर टीम चालवत असल्याचे समोर आले आहे. या सततच्या अंतर्गत संघर्षामुळे आरजेडीचे राजकीय स्वरूप डळमळीत होताना दिसत आहे. लालू परिवारातील वाढती फूट, सार्वजनिक आरोप-प्रत्यारोप आणि पक्षातील गोंधळामुळे आरजेडीची प्रतिमा गंभीरपणे ढासळत असल्याचे राजकीय विश्लेषक मानतात.

हेही वाचा: SBI Shut Down Service: 1 डिसेंबरपासून SBI बंद करणार ‘ही’ महत्त्वाची सुविधा; लाखो ग्राहकांवर होणार परिणाम