Vishal Brahma: स्टुडंट ऑफ द इयर 2 फेम अभिनेत्याला चेन्नई विमानतळावर अटक, 40 कोटी रुपयांचे मेथाकॅलोन ड्रग्ज जप्त
मुंबई: 2019 मध्ये प्रदर्शित झालेल्या 'स्टुडंट ऑफ द इयर 2' या चित्रपटात छोटी भूमिका साकारणारा बॉलिवूड अभिनेता विशाल ब्रह्मा याला सोमवारी चेन्नई विमानतळावर 40 कोटी रुपयांच्या मेथाकॅलोन ड्रग्जसह पकडण्यात आले. आसामचा रहिवासी असलेला 32 वर्षीय ब्रह्मा सिंगापूरहून एआय 347 या विमानाने चेन्नईला परतला होता. तेव्हा महसूल गुप्तचर संचालनालयाने त्याला अवैध वस्तूंसह पकडले. ब्रह्माने 2019 मध्ये करण जोहरच्या 'स्टुडंट ऑफ द इयर 2' या चित्रपटात काम केले होते.
सूत्रांनी दिलेल्या माहितीनुसार, ब्रह्माने आर्थिक अडचणींना तोंड देत एका नायजेरियन टोळीशी संपर्क साधण्याचा निर्णय घेतला. सुरुवातीच्या तपासात असे दिसून आले की ब्रह्माने दिल्लीतील काही ओळखीच्या लोकांशी संपर्क साधला आणि सुरुवातीला एका नायजेरियन ड्रग्ज टोळीच्या सदस्याने त्याला काही लाख रुपये दिले. त्यानंतर त्याला 'पेड व्हेकेशन'च्या नावाखाली कंबोडियाला पाठवण्यात आले. तिथे दुसऱ्या एका नायजेरियनने त्याला ट्रॉली बॅगमध्ये लपवलेले 4 किलो मेथाकॅलोन पॅकेज दिले. टोळीने त्याला सिंगापूरमार्गे चेन्नईला जाण्याची सूचना केली. तो रविवारी एअर इंडियाच्या फ्लाइट एआय 347 ने चेन्नईला पोहोचला, जिथे त्याला प्रवासी आगमन क्षेत्रात डीआरआयने अटक केली. तपास यंत्रणेचे म्हणणे आहे की, उतरल्यानंतर ब्रह्माला डॉ. एमजीआर चेन्नई सेंट्रल रेल्वे स्टेशनजवळील एका हॉटेलमध्ये राहण्याची आणि त्या रात्री दिल्लीला जाण्यासाठी ट्रेनमध्ये चढण्याची सूचना देण्यात आली. दिल्लीत पोहोचल्यानंतर, टोळीचा एक सदस्य ट्रॉली बॅग घेईल.
ब्रह्माला एनडीपीएस कायद्यांतर्गत (नार्कोटिक ड्रग्ज अँड सायकोट्रॉपिक सबस्टन्सेस अॅक्ट) अटक करण्यात आली आहे आणि तुरुंगात पाठवण्यात आले आहे. या गुन्ह्याची सखोल चौकशी सुरू आहे आणि टोळीतील इतर सदस्यांची ओळख पटविण्यासाठी आरोपीची चौकशी केली जात आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.