Dhurandhar 2 : धुरंधर 2 ठरला बॉलीवूडमध्ये सर्वाधिक ओपनिंग वीकेंड कमाई करणारा चित्रपट

दिग्दर्शक आदित्य धर याच्या धुरंधर चित्रपटाचा दुसरा भाग धुरंधर 2 द रिव्हेंज गेल्या आठवड्यात 19 मार्च रोजी प्रदर्शित झाला. पहिल्या चित्रपटाप्रमाणेच त्यांच्या भाग 2 नेही लोकप्रियतेचे सर्व रेकॉर्ड मोडले आहेत. अवघ्या चार दिवसांत या चित्रपटाने 500 कोटींहून अधिक गल्ला जमवला आहे. तसेच धुरंधर 2 चित्रपटगृहामध्ये अजूनही चाहत्यांची गर्दी खेचत आहे. यातच बॉलीवूडमध्ये सर्वाधिक ओपनिंग वीकेंड कमाई करणारा हा चित्रपट ठरला आहे.  यापूर्वी पॅन-इंडिया सुपरस्टार अल्लू अर्जुनने त्याच्या 'पुष्पा 2: द रूल' या अ‍ॅक्शन ड्रामाने धुमाकूळ घातला होता. ज्याने 2024 मध्ये 425 कोटी रुपयांची कमाई करून हिंदीमध्ये पहिल्या आठवड्यात सर्वाधिक कमाई केली होती. परंतू 'धुरंधर 2' ने अविश्वसनीयरीत्या कमी वेळेत हा विक्रम मोडीत काढला आहे. आदित्य धर दिग्दर्शित या स्पाय अ‍ॅक्शन थ्रिलरने प्रीमियरपासूनच जोरदार सुरुवात केली आणि हिंदीमध्ये 4 दिवसांच्या विस्तारित ओपनिंग वीकेंडमध्ये सुमारे 500 कोटी रुपयांची कमाई करून, भारतीय बॉक्स ऑफिसवर एकाच भाषेतील आतापर्यंतचा सर्वाधिक पहिल्या आठवड्यात कमाई करणारा चित्रपट ठरला.

आपल्या ओपनिंग वीकेंडमध्ये, 'धुरंधर 2' ने भारतातील सर्वात मोठ्या पेड प्रिव्ह्यूपासून ते हिंदीमधील पहिल्या, दुसऱ्या, तिसऱ्या आणि चौथ्या दिवसाच्या सर्वाधिक कमाईपर्यंत अनेक दैनंदिन विक्रम रचले. या चित्रपटाने रचलेला सर्वात मोठा विक्रम म्हणजे हिंदीमध्ये एकाच दिवसात 100 कोटींहून अधिक कमाई करणे, आणि त्याने केवळ 4 दिवसांत दोनदा ही कामगिरी केली आहे.

'धुरंधर 2' ने ज्या अविश्वसनीय वेगाने पहिल्या आठवड्यातील कमाईचा विक्रम रचला आहे. ते या चित्रपटाबद्दलची प्रचंड चर्चा आणि पहिल्या भागामुळे निर्माण झालेली उत्सुकता अधोरेखित करते. व्यापार जगताला अपेक्षा आहे की, हा चित्रपट भारतात एकाच भाषेत १००० कोटींच्या कमाईच्या क्लबमध्ये प्रवेश करणारा पहिला चित्रपट ठरेल.

हेही वाचा : Badshah's Tateeree Song Controversy : बादशाहला आणखी एक झटका! हरियाणा पोलिसांनी त्याच्या 154 यूट्यूब व्हिडिओ आणि 703 इन्स्टाग्राम रील्स हटवल्या

विशेष म्हणजे, केवळ 4 महिन्यांपूर्वी प्रदर्शित झालेला मूळ 'धुरंधर' हा चित्रपट 835 कोटींहून अधिक कमाईसह सध्या हिंदीतील आणि एकाच भारतीय भाषेतील सर्वाधिक कमाई करणारा चित्रपट आहे. या यादीत 'पुष्पा 2' चित्रपटाने 810 कोटींहून अधिक कमाईसह तिसऱ्या क्रमांकावर आहे. कारण गेल्या काही वर्षांपासून हिंदी बॉक्स ऑफिस सातत्याने उत्तम कामगिरी करत आहे.

1 धुरंधर 2 (2026) – 430+ कोटी (4D)
2 पुष्पा 2 (2024) – 425.10 कोटी
3 पठाण (2023) – 351 कोटी
4 जवान (2023) – 347.98 कोटी
5 स्त्री २ (2024) – 291.65 कोटी