Govinda Health Update: अभिनेता गोविंदा यांना 24 तासांच्या आत डिस्चार्ज; स्वतः सांगितलं प्रकृती बिघडण्याचं खरं कारण, म्हणाले ‘मी अति…

Govinda Health Update: बॉलिवूडचा सुपरस्टार आणि सर्वांचा लाडका अभिनेता गोविंदा यांची प्रकृती अचानक खालावल्याने मंगळवारच्या मध्यरात्री त्यांना मुंबईतील क्रिटिकेअर रुग्णालयात दाखल करण्यात आलं होतं. घरात असताना त्यांना चक्कर आली आणि अस्वस्थ वाटू लागल्याने कुटुंबीयांनी तत्काळ त्यांना रुग्णालयात नेलं. चाहत्यांमध्ये या बातमीमुळे एकच खळबळ उडाली होती. मात्र, आता चांगली बातमी अशी आहे की, गोविंदा यांना 24 तासांच्या आत डिस्चार्ज मिळाला आहे आणि ते पूर्णपणे सुरक्षित आहेत.

रुग्णालयातून बाहेर पडताच गोविंदांनी स्वतः मीडियाशी संवाद साधत आपली आरोग्यस्थिती स्पष्ट केली. ते म्हणाले, “मी मागील काही दिवसांपासून खूपच मेहनत घेत होतो. अति प्रमाणात व्यायाम आणि शारीरिक श्रम केल्याने शरीर थकून गेलं. त्यामुळे थोडा वेळ विश्रांतीची गरज होती. योग आणि प्राणायाम उत्तम आहेत, पण अति व्यायाम शरीरावर ताण आणतो. आता डॉक्टरांनी औषधं दिली आहेत आणि मी बरा आहे.”

हेही वाचा: Dharmendra Health Update: ज्येष्ठ अभिनेते धर्मेंद्र यांना हॉस्पिटलमधून मिळाला डिस्चार्ज; घरातच सुरू राहणार उपचार

या वेळी गोविंदा काळ्या टी-शर्टमध्ये, चॉकलेटी जॅकेट, जीन्स आणि काळ्या चष्म्यासह दिसले. नेहमीप्रमाणे त्यांचा करिष्माई लूक चाहत्यांच्या लक्षात राहिला.

गोविंदाचे जवळचे मित्र आणि कायदेशीर सल्लागार ललित बिंदल रुग्णालयात जाऊन त्यांना घरी घेऊन आले. त्यांनी मीडियाला सांगितलं की, “गोविंदा आता बरे आहेत. त्यांना काल सकाळपासूनच थोडं अस्वस्थ वाटत होतं आणि रात्री चक्कर येऊ लागल्याने आम्ही डॉक्टरांचा सल्ला घेतला.” गोविंदाची पत्नी सुनीता आहूजा त्या वेळी एका लग्नसमारंभासाठी बाहेरगावी गेल्याने उपस्थित राहू शकली नाही.

गोविंदाची प्रकृती बिघडल्याची बातमी समजताच चाहत्यांनी सोशल मीडियावरून त्यांच्या लवकर बरे होण्यासाठी शुभेच्छांचा वर्षाव केला. चाहत्यांच्या प्रेमाने आणि डॉक्टरांच्या योग्य उपचारांनी आता ते पूर्ण बरे झाले आहेत.

दरम्यान, धर्मेंद्र यांनाही अलीकडेच तब्येतीच्या समस्येमुळे रुग्णालयात दाखल करण्यात आलं होतं. योगायोगाने त्यांनाही आजच डिस्चार्ज मिळाला. याबद्दल गोविंदांनी आनंद व्यक्त करत म्हटलं, “मी धर्मेंद्रजींना प्रणाम करतो. ते माझे प्रेरणास्थान आहेत.”

धर्मेंद्र आणि गोविंदा या दोन्ही पिढ्यांतील सुपरस्टार्सनी एकाच दिवशी रुग्णालयातून बाहेर पडल्याने चाहत्यांनी सुटकेचा निश्वास टाकला आहे. सोशल मीडियावर “दोन्ही दिग्गज परत आले” अशा प्रतिक्रिया पाहायला मिळत आहेत.

हेही वाचा: Govinda Hospitalised: अभिनेता गोविंदाची प्रकृती बिघडली; रुग्णालयात उपचार सुरू

गोविंदाच्या चाहत्यांसाठी हा दिलासादायक क्षण आहे. अनेक दशकांपासून आपल्या अभिनय, नृत्य आणि विनोदी शैलीने प्रेक्षकांचे मनोरंजन करणाऱ्या या कलाकाराची आरोग्य स्थिती आता सुधारली आहे. ते म्हणाले, “शरीर आपलं मंदिर आहे. त्याची काळजी घ्यायला हवी. मी आता संतुलित जीवनशैलीकडे परततोय.”