Chhatrapati Sambhajinagar: सातबारा नोंदीसाठी संघर्ष; पैठण तहसील कार्यालयात महिलेने उचललं टोकाचं पाऊल
छत्रपती संभाजीनगर जिल्ह्यातील पैठण तहसील कार्यालयात गुरुवारी घडलेल्या एका धक्कादायक घटनेने प्रशासनाच्या कार्यपद्धतीवर पुन्हा प्रश्नचिन्ह निर्माण केले आहे. जमिनीच्या फेरफाराची नोंद आणि सातबारा उताऱ्यावर आवश्यक बदल होत नसल्याने त्रस्त झालेल्या एका महिलेने थेट तहसील कार्यालयाच्या परिसरात आयुष्य संपवण्याचा प्रयत्न केला. या घटनेमुळे कार्यालय परिसरात काही काळ तणावाचे वातावरण निर्माण झाले.
मिळालेल्या माहितीनुसार, कारकीन मळा येथील रहिवासी शोभा बबन कुदळे या गेल्या अनेक दिवसांपासून त्यांच्या जमिनीच्या फेरफाराची प्रक्रिया पूर्ण व्हावी आणि सातबारा उताऱ्यावर आवश्यक नोंद करण्यात यावी, यासाठी प्रशासनाकडे पाठपुरावा करत होत्या. यासंदर्भात त्यांनी अनेक वेळा अर्ज करूनही कोणतीही ठोस कार्यवाही झालेली नसल्याचा त्यांचा आरोप आहे.
प्रशासनाकडून वारंवार होणाऱ्या विलंबामुळे संतप्त झालेल्या शोभा कुदळे यांनी तहसील कार्यालय परिसरातील सौरऊर्जा बल्बच्या खांबाला साडी बांधून गळफास घेण्याचा प्रयत्न केला. उपस्थित नागरिक आणि कर्मचाऱ्यांनी वेळीच धाव घेतल्याने मोठी दुर्घटना टळली. या प्रकारामुळे काही काळ तहसील कार्यालयात गोंधळाचे वातावरण निर्माण झाले.
विशेष म्हणजे, हा त्यांचा पहिलाच आंदोलनाचा मार्ग नव्हता. यापूर्वीही त्यांनी याच मागणीसाठी तहसील कार्यालयातील पाण्याच्या टाकीवर चढून आंदोलन केले होते. त्यानंतरही त्यांच्या मागण्यांवर अपेक्षित निर्णय झाला नसल्याने त्यांनी पुन्हा टोकाचे पाऊल उचलल्याचे सांगितले जात आहे.
शोभा कुदळे यांनी प्रशासनावर गंभीर आरोप करत, वारंवार निवेदने आणि अर्ज देऊनही त्यांच्या समस्येकडे दुर्लक्ष करण्यात आल्याचे म्हटले आहे. संबंधित महसूल प्रक्रियेत होत असलेल्या दिरंगाईमुळे त्यांना मानसिक त्रास सहन करावा लागत असल्याचेही त्यांनी व्यक्त केले.
दरम्यान, मागणी तातडीने पूर्ण झाली नाही तर येत्या २२ जुलै रोजी आत्मदहन करण्याचा इशारा त्यांनी प्रशासनाला दिला आहे. या इशाऱ्यामुळे महसूल विभागासमोर नवे आव्हान उभे राहिले असून, प्रशासन या प्रकरणात काय भूमिका घेणार याकडे सर्वांचे लक्ष लागले आहे
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.